نیا کاروبار کیسے شروع کیا جائے ؟

موجودہ دور خود سے کوئی کاروبار شروع کرنےسے عبارت ہے کیوں کہ بڑھتی مہنگائی نے آمدن و اخراجات کے مابین بہت بڑا فاصلہ پیدا کردیا ہے۔ اگر انسان کی معاشی تاریخ کا جائزہ لیا جائے تو صدیوں سے انسان تجارت کو اہمیت دیتا آرہا ہے اور اسے پیشہ پیغمبری مانا گیا ہے کیونکہ جتنے بھی پیغمبر آئے، انہوں نے خود سے کاروبار کرنے کو اہمیت دی۔ اب سوال یہ پیدا ہوتا ہے کہ کاروبار کیسے کیا جائے؟ اس ضمن میں جن ضروری امور کو دھیان میں رکھنا لازمی ہے، وہ ذیل میں پیش کیے جارہے ہیں۔

منصوبہ بندی اور حکمت عملی

سب سے پہلے آپ کو اپنی طبیعت اور میلان کا جائزہ لینا ہے کہ کون سے کاروبار میں آپ دلچسپی رکھتے ہیں اور اس کاروبار کو کرنے کے لیے آپ کی صلاحیت اور قابلیت کیا ہے۔ اس فیصلے پر پہنچنے کے بعد یہ دیکھیں کہ آپ کے پاس کتنا سرمایہ ہے۔ سب سے پہلے تو ایسے کام سے آغاز کیجیے، جس میں کم از کم سرمائے سے زیادہ نفع حاصل کرنے کے امکانات روشن ہوتے ہوں۔ مثال کے طور پر کریانے کی چھوٹی دکان آپ کے لیے اچھی ابتداء ہوسکتی ہے جہاں آٹا،چینی،دال،چاول جیسی روزمرہ استعمال کی اشیا تھوک مارکیٹ سے بآسانی مل جاتی ہیں۔ اس کے علاوہ اب ہر کمپنی نے اپنا سیلز سروس سسٹم اتنا مضبوط کرلیا ہے کہ آپ کو اپنی دکان پر بیٹھے بٹھائے سارا سامان مل جاتا ہے اور آپ اضافی اخراجات سے بھی بچ جاتے ہیں۔ انتہائی دلجمعی سے اپنا یہ کاروبار کیجیے اور شروع سے ہی ایسی حکمت عملی اپنائیے کہ آپ کو نقد سامان خریدنے والے گاہک مل جائیں جبکہ ادھار لینے والے گاہکوں کے لیے ایسا حساب رکھیے کہ مقرر تاریخ پر ادائیگی ممکن ہوجائے۔ اپنا کام ایمانداری سے کیجیے، اس طرح مارکیٹ میں آپ کی اچھی ساکھ بن جائے گی۔ دنیا بھر کی کامیاب کمپنیوں کا ایک ہی اصول رہا ہے کہ وہ کسی بھی قیمت پر ایمانداری اور معیار کونہیں چھوڑتیں اور جو غیر معیاری اشیا بنا کر بیچتے ہیں وہ بھلے پیسے کماتے ہوں لیکن اس پیسے میں رتی برابر بھی برکت نہیں ہوتی۔ ہمارے کرنسی نوٹوں پر بھی یہی لکھا ہوتا ہے کہ’’ رزقِ حلال عین عبادت ہے‘‘۔ کوئی بھی کاروبار سچائی، خلوص اور دلچسپی کا تقاضا کرتا ہے۔

حساب کتاب کو اوّلین ترجیح دیجیے

کسی بھی کاروبار کا بنیادی تقاضہ یہ ہے کہ آپ جو بھی خدمات انجام دے رہے ہیں، اس کا حساب کتاب رکھیے۔ اس کے لیے اکاؤنٹ مینجمنٹ کا دھیان رکھنا لازمی ہے، جو بھی چیز آپ بیچ یا بنا رہے ہیں اس کا مکمل حساب رکھیے اور اس حوالے سے رجسٹر میں نوٹ کریں کہ آپ نے کس تاریخ کو کون سی چیز کس کمپنی سے خریدی تھی؟ کس کمپنی نمائندے کے ہاتھوں لین دین ہوئی تھی؟ تمام اشیا کی رسیدیں لازمی لےکراپنے پاس محفوظ کرلیجیے اور اسے ترتیب سے فائل میں رکھیے۔ اس کے بعد جب کوئی بھی گاہک آپ سے کوئی چیز خرید لے تو اسے ایک الگ رجسٹر میں لکھیے۔ اگر کسی کو سامان ادھار پر ے رہے ہیں تو اس کی تمام تفصیلات درج کریں، نیز اُدھار لینے والے کا پتہ اورفون نمبر لازمی لکھیں۔ آپ ہوم ڈیلیوری کی خدمات بھی مہیا کرکے اپنی فروخت اور ساکھ کو بہتر بنا سکتے ہیں، تاکہ لوگوں کو گھر بیٹھے چیزیں دستیاب ہوجائیں، جیسے دودھ فروش کرتے ہیں۔ ہر ایک چیز کی خرید و فروخت کا روزمرہ بنیادوں پر جائزہ لیجیے کہ کون کون سے ضروری آئٹمز کی مانگ ہے۔ اس کے بعد ان ضروری اشیا کو بنانے والی کمپنیوں سے رابطہ کیجیے کہ وہ آپ کو زیادہ سے زیادہ کتنا منافع دے سکتی ہیں۔ تھوک فروش مارکیٹ تک اشیاء صرف پہنچتے پہنچتے مہنگی ہو جاتی ہیں، اس لیے کوشش کرکے چیزیں بنانے اور اُگانے والوں سے براہ راست رابطہ کریں تاکہ آپ کو سستے داموں چیزیں مل سکیں اور زیادہ منافع حاصل ہو۔ اسی طرح سیلز مین سے زیادہ ارزاں داموں پر اشیا خریدنے کی کوشش کریں، آجکل سپر اسٹورز ایسا ہی کر رہے ہیں اور یہی وجہ ہے کہ کم از کم منافع رکھ کر وہ عوام کی بڑی تعداد کو اپنی جانب مائل کرلیتے ہیں۔

زائد آمدن محفوظ رکھیے

ہمارے اکثر کاروباری حضرات جب منافع دیکھتے ہیں تو پیسے کی لین دین اور آمدن و اخراجات سے غافل ہوجاتے ہیں، ساتھ ہی غیر

محسوس طریقے سے لگژری آئٹمز میں پیسہ خرچ کرکے خسارے کا سامنا کرتے ہیں۔ یاد رکھیے کہ جیسا حساب کتاب آپ کو اشیا کی خرید کے وقت رکھنا ہے، ویسا ہی حساب کتاب ان چیزوں کی فروخت کے وقت بھی کرنا ہے کہ کس چیز نے آپ کو کتنا منافع دیا اور زائد رقم کا آپ نے کیا کیا۔ ان تمام امور کی اکاؤنٹنگ مینجمنٹ لازمی ہے،تاکہ آپ جان سکیں کہ ان تمام اخراجات کے بعد کتنی رقم بچ جاتی ہے جو آپ کا خالص منافع ہے۔ اس رقم کو مشکل دنوں کے لیے محفوظ کرتے جائیےکیونکہ وقت کبھی ایک سا نہیں رہتا اور کوئی کاروبار دائم نہیں رہتا۔ اگر کہیں کسی چیز میں خسارہ ہوجائے تو وہ زائد رقم آپ کو دیوالیہ ہونے سے بچائے گی۔