• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

’’وزیر اعظم جنوبی پنجاب صوبے سے متعلق جلد اہم اعلان کرینگے‘‘

تازہ ترین
قومی خبریں
12 نومبر ، 2018

’’وزیر اعظم جنوبی پنجاب صوبے سے متعلق جلد اہم اعلان کرینگے‘‘

وزیراعلیٰ پنجاب عثمان بزدار نے کہا ہے کہ وزیراعظم عمران خان جنوبی پنجاب صوبے کے قیام سے متعلق اہم اقدامات کا اعلان جلد کریں گے۔

جیو نیوز کے سینئر اینکر پرسن حامد میر سے گفتگو کرتے ہوئے وزیراعلیٰ پنجاب عثمان بزدارنے کہا کہ جنوبی پنجاب صوبے کے قیام کیلئے وزیراعظم عمران خان اتحادی جماعتوں اور اپوزیشن ارکان پر مشتمل کمیٹی تشکیل دیں گے جو اس معاملے کی نگرانی کرے گی۔

وزیراعلیٰ پنجاب کے مطابق پنجاب کی صوبائی کابینہ کا مہینے میں ایک اجلاس جنوبی پنجاب میں منعقد کیا جائے گا جبکہ اس خطے کیلئے ترقیاتی منصوبوں کا بھی اعلان کیا جائے گا۔

انہوں نے کہا کہ وزیراعظم عمران خان نے اپنی انتخابی مہم میں جنوبی پنجاب صوبے کے قیام کا وعدہ کیا تھا، تحریک انصاف کی حکومت کے 100 دن مکمل ہونے سے قبل وزیراعظم صوبے کے قیام سے متعلق اہم اقدامات کا اعلان کریں گے۔

دوسری جانب حکومتی اتحادی ق لیگ سے تعلق رکھنے والے وفاقی وزیر طارق بشیر چیمہ نے جنوبی پنجاب صوبے کی مخالفت کردی۔

کیپٹل ٹاک میں گفتگو کرتے ہوئے طارق بشیر نے کہا کہ وہ یہ معاملہ وزیراعظم سے ملاقات میں اٹھائیں گے۔

انہوں نے کہا کہ ’’میں جنوبی پنجاب صوبے کے قیام کے خلاف نہیں بلکہ جنوبی پنجاب صوبے میں بہاولپور کو بھی شامل کرنے کی تجویز کے خلاف ہوں، میں وزیراعظم عمران خان سے ملاقات کروں گا اور ان کی پرانی تقریریں بھی ساتھ لے جاؤں گا جن میں انہوں نے بہاولپور صوبے کے حق میں باتیں کی تھیں‘‘۔

طارق بشیر نے کہا کہ پیپلز پارٹی اور ن لیگ پنجاب اسمبلی میں بہاولپور اور جنوبی پنجاب صوبے کے قیام کیلئے قراردادیں منظور کرچکے ہیں۔

تازہ ترین