واسا افسر سائیکلوں پر آ گئے

November 27, 2021


ملک کے دوسرے بڑے شہر لاہور میں اسموگ کے تدارک کے لیے واسا حکام کی جانب سے آگاہی مہم جاری ہے، جس کے تحت افسران اورملازمین آج (ہفتے کے روز) بھی سائیکلوں پر دفتر پہنچے۔

اس مقصد کے لیے ہفتے کا دن مخصوص کیا گیا ہے، اس روز ماحول کو بہتر بنانے کے لیے گاڑیوں کا استعمال محدود کر دیا گیا ہے۔

واضح رہے کہ اسموگ کی صورتِ حال کے پیشِ نظر واسا افسران اور ملازمین کئی ہفتوں سے ہفتے میں ایک دن سائیکلوں پر دفتر آ رہے ہیں۔

محکمۂ واسا کی جانب سے اسموگ کے پیشِ نظر ہفتے کا دن کار فری قرار دیا گیا ہے اور اس حوالے سے واسا کی جانب سے اعلامیہ بھی جاری کیا گیا ہے۔

محکمۂ واسا کے جاری کیئے گئے اعلامیئے میں کہا گیا ہے کہ واسا ملازمین ہفتے کے روز پرائیوٹ ٹرانسپورٹ یا سائیکل پر آفس آئیں گے۔

واسا افسران و ملازمین کی اس کوشش کے باعث ناصرف ماحول بلکہ ان کی صحت پر بھی خوش گوار اثرات مرتب ہونے کے امکانات ہیں۔

لاہور سمیت پنجاب بھر میں فضائی آلودگی اور اسموگ کے مکمل خاتمے کے لیے زندگی کے دیگر شعبوں سے تعلق رکھنے والے افراد کو بھی ان واسا افسران و ملازمین کی تقلید کرنے کی ضرورت ہے۔