نیویارک /کراچی (نیوز ڈیسک) پودے سے نکلنے والے وائرس شکن عنصر( Thapsigargin (TGایسے زہریلے پودوں سے خارج ہوتا ہے جنہیں ’’زہریلی گاجریں‘‘ (ڈیڈلی کیروٹس) کہا جاتا ہے اور اس عنصر کے متعلق بتایا گیا ہے کہ یہ کورونا وائرس کی تمام اقسام کو بے اثر کرنے میں کامیاب ثابت ہوا ہے، حتیٰ کہ تیزی سے پھیلنے والے ڈیلٹا ویرینٹ کو بھی۔ سائنس میگزین کی رپورٹ میں بتایا گیا ہے کہ اس عنصر کے حوالے سے فروری میں بھی ایک تحقیق سامنے آئی تھی کہ ٹی جی نامی عنصر کئی وائرس کیخلاف موثر ثابت ہوا ہے لیکن اب اسی ریسرچ ٹیم کی ایک نئی تحقیق میں بتایا گیا ہے کہ کورونا وائرس میں میوٹیشن (تبدیلی) کے باوجود ٹی جی کے اثرات زائل نہیں ہوتے۔ رپورٹ میں بتایا گیا ہے کہ لیبارٹری میں کیے گئے تجربات سے معلوم ہوتا ہے کہ انفیکشن سے قبل یا دوران انفیکشن ٹی جی کی خوراک سے انفیکشن کو کنٹرول میں مدد ملی اور ساتھ ہی انفیکشن میں مصنوعی انداز سے کی گئی تبدیلیوں (اے بی، اے ڈی اور بی ڈی ویرینٹ) کے بعد بھی ٹی جی کی ایک ہی خوراک نے تمام انفیکشن کو ختم کرنے میں اہم کردار ادا کیا۔