ملتان (سٹاف رپورٹر) محکمہ واسا کا شعبہ ریکوری نادہندہ سرکاری محکموں کے سامنے بے بس ہو گیا ، سرکاری محکموں نے پانی اور سیوریج کے بلوں کی مد میں کروڑوں روپے دبا لئے - سرکاری محکموں سے ریکوری نہ ہونے سے ریکوری اہداف کا حصول بھی مشکل ہو گیا ہے ، دوسری جانب ڈیڈ ڈیفالٹرز سے بھی ریکوری کے لئے اقدامات نہ اٹھائے جانے کا انکشاف ہوا ہے ۔ تفصیلات کے مطابق محکمہ واسا انتظامیہ کی جانب سے نادہندہ سرکاری محکموں اور ڈیڈ ڈیفالٹرز کے خلاف مؤثر لائحہ عمل تشکیل نہیں دیا جا سکا ، جس کی وجہ سے نادہندہ محکموں اور ڈیڈ ڈیفالٹرز کی تعداد میں بھی مسلسل اضافہ ہو رہا ہے - نادہندہ سرکاری محکموں میں ضلعی ، صوبائی اور وفاقی محکمہ جات شامل ہیں ۔ جامعہ زکریا 2 کروڑ 33 لاکھ ، محکمہ ریلوے ایک کروڑ 83 لاکھ ، میپکو کا قاسم پور گرڈ سٹیشن ایک کروڑ 20 لاکھ ، وہاڑی روڈ گرڈ اسٹیشن ایک کروڑ 20 لاکھ 24 ہزار ، جبکہ محکمہ انہار 64 لاکھ روپے سے زائد کا نادہندہ ہے - تعلیمی بورڈ 36 لاکھ ، مدنی پارک 25 لاکھ ، باغ لانگے خان 18 لاکھ ، گورنمنٹ ڈسٹرکٹ اسپتال 12 لاکھ ، سرکٹ ہاؤس 6 لاکھ روپے کے ساتھ نادہندگان محکموں کی فہرست میں شامل ہیں ۔ ڈپٹی کمشنر آفس ، پولیس ٹریننگ انسٹی ٹیوٹ ، ابن قاسم پارک ، ایڈمنسٹریٹر غلہ منڈی ، پولیس لائن سمیت دیگر محکمے بھی واسا کے لاکھوں روپے کے نادہندہ ہیں ۔ اس حوالے سے واسا انتظامیہ کا کہنا ہے کہ نادہندہ سرکاری محکموں اور ڈیڈ ڈیفالٹرز سے ریکوری کے لئے جلد لائحہ عمل بنا لیا جائے گا ، مختلف اداروں سے مسلسل رابطے میں ہیں۔