ماہرین نے جدت سے بھر پور ایک اسپیکر تیار کیا ہےجو 360 درجے دائرے میں اعلیٰ معیار کی آواز بکھیرتا ہے۔ اس طر ح ایک ہی اسپیکر مکمل سراؤنڈ ساؤنڈ کا تجربہ فراہم کرتا ہے۔ دوسری جانب اس کی بیس بہت ہی شاندار ہے جو آپ کے گھر میں موسیقی اور آوازکو ایک نیا عنوان دیتی ہے۔ اس کی خاص بات یہ ہے کہ اپنے تمام خواص کے باوجود اس کی جسامت بہت ہی چھوٹی ہے۔ اسے نوکیلی ٹوپی کی طرح بنایا گیا ہے، جس کے اطراف باریک خانے یکساں انداز میں آواز خارج کرتے ہیں۔
ہائی فائی ساؤنڈ کے لیے ٹرے ساؤنڈ ون کو خاص طور پر ڈیزائن کیا گیا ہے اور اسے مکمل طور پر ہاتھ سے بنایا گیا ہے۔ لکڑی کے فریم کے اندر اس کی حساس برقیات کو رکھا گیا ہے۔ دوسری جانب بلیوٹوتھ ٹیکنالوجی سےبھی کام کرتا ہے۔ اگر اسے کمرے کے کونے میں بھی رکھ دیا جائے تو اپنے ڈیزائن کی بنا پر یہ پورے کمرے میں ہرسو آواز بکھیرتا ہے۔
اس کا دوسرا پہلو یہ ہے کہ موسیقی کے مختلف نوٹس اور سازکی آواز کو یہ اس طرح خارج کرتا ہے کہ ہر قسم کی آواز یکساں انداز میں محسوس کی جاسکتی ہے۔ دوسری جانب باریک آوازیں خارج کرنے کے لیے اس میں خاص مقناطیسی ٹویٹر لگائے گئے ہیں۔مکمل طور پر ہاتھ سے بنے اسپیکر کو ایک درجن سے زائد پرتوں سے تشکیل دیا گیا ہے ۔ فی الحال اس کی قیمت 400 ڈالر مقرر کی گئی ہے ۔