’خونی انقلاب‘ کی دھمکیاں دینے والوں کے منصوبے کا آغاز ہوگیا، مریم نواز

May 24, 2022

فائل فوٹو

مسلم لیگ ن کی نائب صدر مریم نواز کا کہنا ہے کہکئی دنوں سے ریاست کو ’خونی انقلاب‘ کی دھمکیاں دینے والوں نے آج سے ناپاک منصوبے کا آغاز کردیا ہے۔

مریم نواز کی جانب سے سماجی رابطے کی سائٹ ٹوئٹر پر گزشتہ روز فائرنگ کے نتیجے میں اہلکار کمال احمد کی شہادت پر اظہارِ افسوس کیا گیا اور واقعے کے خلاف مذمت کی گئی ہے۔

ٹوئٹر پر جاری بیان میں مریم نواز نے کہا کہ آج فتنے کی کرسی کی لالچ کی وجہ سے ایک ماں کا لخت جگر اس سے الگ ہوگیا اور پاکستان کا بیٹا بے دردی سے شہید کر دیا گیا۔

انہوں نے یہ بھی کہا کہ قوم کے محافظوں پر گولیاں برسانے والے کسی رعایت کے مستحق نہیں۔

دوسری جانب وفاقی وزیرداخلہ رانا ثناء اللّٰہ کا کہنا ہے کہ بےگناہ پولیس اہلکار کمال احمد کے سینے میں لگی گولی ثبوت ہے کہ عمران خان دہشتگرد ہے، کمال احمد کا قاتل عمران خان، شیخ رشید اور اس کے حواری ہیں۔

رانا ثناءاللّٰہ نے کہا کہ خونی مارچ ہوگا کے اعلانات کرنے والوں سے حساب لیں گے، پولیس پر فائرنگ سے یہ بات ثابت ہوگئی ہے کہ یہ سیاسی سرگرمی نہیں۔

خیال رہے کہ رات گئے لاہور کے علاقے ماڈل ٹاؤن میں پی ٹی آئی رہنما کے گھر چھاپے کے دوران ایک مکان کی چھت سے کی گئی فائرنگ سے کانسٹیبل شہید ہوگیا تھا۔

پولیس کے مطابق اہلکار کمال احمد کو سینے پر گولی لگی تھی، اسپتال لے جایا گیا جہاں وہ جانبر نہ ہو سکا۔

ڈی آئی جی آپریشنز سہیل چوہدری نے کہا کہ چھاپے کے دوران ساجد نامی شخص کے گھر کی چھت سے کسی نے فائر کیا گیا تھا۔