کراچی(اعظم علی /نمائندہ خصوصی ) لیاری کے مختلف علاقوں میں منشیات اورگٹکا،ماواکی کھلے عام فروخت جاری پولیس خاموش تماشائی بن گئی،تفصیلات کے مطابق کلاکوٹ ‘ریکسرلین کڈوی لائن، کمہارواڑہ،بکراپڑی سمیت لیاری کے مختلف علاقوں میں کھلے عام منشیات فروخت ہورہی ہے، گٹکا ماوابھی بلاروک ٹوک دستیاب ہے تاہم پولیس منشیات فروشوں کو گرفتارکرنے کی بجائے محض نشہ کرنے والوں کو ڈنڈے مارنے تک محدود ہے ،عوامی حلقوں کا کہنا ہے کہ نوعمرلڑکے بڑی تیزی سے نشے کی لت ، کینسرسمیت مختلف عوارض کا شکار ہورہے ہیں مگر باربار شکایت کے باوجودپولیس اس ناسور کا پھیلاؤروکنے میں بری طرح ناکام ہوگئی ہے،شہریوں نے ایس ایس پی سٹی ‘ڈی آئی جی ساؤتھ اور ایڈیشنل آئی کراچی سے مطالبہ کیاہے کہ منشیات اور گٹکا ماوہ کی خریدو فروخت میں ملوث عناصرکو فی الفورگرفتارکیاجائے اور ان کی سرپرستی کرنے والی پولیس کی کالی بھیڑوں کے خلاف بھی کارروائی عمل میں لائی جائے ۔اس سلسلے میں رابطہ کرنے پر ایس ایچ اوکلاکوٹ غفار کورائی کا کہنا تھاکہ وہ فون پر بات نہیں کرسکتے ‘تھانے آکر بات کرلیں۔