لاہور کے اسپتال میں داخل معروف دانشور، ادیب، کالم نگار مستنصر حسین تارڑ کی طبیعت میں بتدریج بہتری آ رہی ہے۔
مستنصر حسین تارڑ گزشتہ 3 روز سے پنجاب انسٹی ٹیوٹ آف کارڈیالوجی میں زیرِعلاج ہیں۔
پنجاب انسٹی ٹیوٹ آف کارڈیالوجی کے معالج ڈاکٹر تحسین کے مطابق مستنصر حسین تارڑ کے تمام ضروری ٹیسٹ روزانہ کی بنیاد پر کیے جا رہے ہیں۔
گزشتہ روز ’جیو نیوز‘ سے گفتگو کرتے ہوئے ڈاکٹر تحسین نے بتایا تھا کہ مستنصرحسین تارڑ کو ہارٹ بیٹ میں اعتدال نہ ہونے پر اسپتال لایا گیا تھا۔
انہوں نے بتایا تھا کہ مستنصر حسین تارڑ کو پیس میکر لگایا گیا ہے۔
مستنصر حسین تارڑ کو ایکسٹرنل پیس میکر لگانے کے بعد سی سی یو میں شفٹ کر دیا گیا تھا۔