ایوب خان کے اقتدار کے دوران پاکستان میں سیاہ ترین دور شروع ہوا، حامد میر، اُردو کانفرنس سے خطاب

December 04, 2022

کراچی( اسٹاف رپورٹر) پندرہویں عالمی اردو کانفرنس میں ’پاکستان آج اورکل‘ کے عنوان سے منعقد اجلاس سے گفتگو کرتے ہوئے معروف صحافی و سینئراینکر حامد میر نے کہا کہ اگر ڈھاکا کی شکست سیاسی ناکامی تھی تو پھر ہتھیار ڈالنے والوں کا سربراہ جنرل نیازی کیوں تھا کوئی سیاسی لیڈر کیوں نہیں تھا، پاکستان میں میڈیا الیکٹرونک ہو یا پرنٹ سچ نہیں بول سکتا، اگر سچ بولیں تو غدار کہا جاتا ہے اس لئے سوچا غداروں کی فہرست میں شامل ہوجائوں ، آئین میں لکھا ہوا ہے کہ اس ملک میں اردو دفتری زبان ہو گی لیکن سپریم کورٹ میں آج بھی فیصلہ انگریزی میں لکھے جاتے ہیں ۔ انہوں نے مزید کہا کہ پاکستان میں ہر دور میں تاریکی رہی ہے چاہئے وہ جمہوری ہو یا آمریت، یہ مقولہ درست ہے کہ بدترین جمہوریت بھی بہترین آمریت سے بہتر ہے۔ ایوب خان کے دور کو لوگ ترقی کا دور کہتے ہیں لیکن اسی دور میں پاکستان میں سیاہ ترین دور شروع ہوا۔ کمزور وزیراعظم فیروز خان نون کے دور میں گوادر پاکستان میں شامل ہوا۔ اور مضبوط یحییٰ خان کے دور میں بنگلہ دیش ہم سے الگ ہو گیا۔ ہر ڈکٹیٹر کا دور سیاہ دور ہے اور کرپٹ جمہوری دور بھی بہتر ہے ہمیں اسی کمزور جمہوری دور کو مضبوط کرنا ہے۔حامد میر نے کہا کہ1971 کے انتخابات میں بھی بنگال میں دھاندلی کی کوشش کی گئی لیکن وہ کامیاب نہیں ہوئی ، بنگالیوں نے پاکستان نہیں توڑا یہ کوتائی ہم سے ہوئی، جن لوگوں نے ایوب خان کے صدارتی دور سے سبق نہیں سیکھا وہ صدارتی نظام کی بات کرتے ہیں ۔ یہ وہ لوگ ہیں جو پاکستان میں ایک صوبہ کی حکومت چاہتے ہیں۔ حامد میر نے کہا کہ مونس الٰہی کے بیان کے بعد واضع ہوتا ہے کہ ادارہ غیرجانبدار تھا لیکن سربراہ سیاست میں شامل تھا اس کی وضاحت ہونی چاہئے، 28سال بعد پاکستان سو سال کا ہو گا اور آبادی چالیس کروڑ ہوگی اور ایک رپورٹ کے مطابق کراچی اور ٹھٹھہ سمندر کے نیچے چلا جائے گا اس کے لیے تیار اور ٹھیک ہونا چاہئے اس کے لیے ہر ایک کو قانون کے تابع ہونا چاہئے، پاکستان کا میڈیا سچ نہیں بول سکتا۔سیشن کی نظامت کے فرائض معروف اینکر پرسن ابصا کومل نے ادا کیے۔