ملک اس وقت یقیناً مشکل معاشی صورتحال سے دوچار ہے لیکن اس پر قابو پانے کی کوششوں میں حصہ لینے کی بجائے حکومت مخالف بعض عناصر اسے بڑھا چڑھا کر پیش کر رہے ہیں اور یہ تاثر دینے میں مصروف ہیں کہ پاکستان اقتصادی طور پر دیوالیہ ہونے کے قریب پہنچ گیا ہے اور سری لنکا کی طرح بس دیوالیہ ہونے ہی والا ہے۔ اس سلسلے میں سوشل میڈیا پر پراپیگنڈہ کیا جا رہا ہے کہ حکومت نے ملک میں مالیاتی ایمرجنسی نافذ کرنے کا منصوبہ بنا لیا ہے۔ وزارت خزانہ کے ترجمان نے اس دعوے کی سختی سے تردید کرتے ہوئے واضح کیا ہے کہ ایسا کوئی منصوبہ زیر غور نہیں ہے۔ اس حوالے سے خاص طور پر سوشل میڈیا پر کئے جانے والے پراپیگنڈہ کا مقصدملک کی معیشت کے بارے میں بے یقینی کو ہوا دینا ہے۔ ملکی معیشت کی موجودہ صورتحال کے اسباب اور ان کے حل کے حکومتی اقدامات کا حوالہ دیتے ہوئے ترجمان نے کہا کہ پاکستان کی معاشی قوت اور تنوع کے پیش نظر سری لنکا سے اس کا موازنہ کیا ہی نہیں جا سکتا، حکومت وفاقی کابینہ کی منظوری سے کفایت شعاری کے موثر اقدامات کررہی ہے جن کا مقصد غیر ضروری اخراجات ختم کرنا ہے۔ اسی طرح توانائی کا تحفظ کیا جا رہا ہے تاکہ درآمدی بل کم کیا جا سکے۔ حکومتی اقدامات سے کرنٹ اکائونٹ خسارے میں کمی اور ایف بی آر کے ریونیو اہداف کے حصول میں کامیابی ہوئی ہے۔ ملکی معیشت استحکام کی طرف بڑھ رہی ہے جس کا اعتراف بین الاقوامی ادارے بھی کر رہے ہیں۔ معاشی مشکلات کے اس دور میں مالیاتی ایمرجنسی اور ڈیفالٹ کا بے بنیاد پراپیگنڈہ کرنا، جھوٹے پیغامات گھڑنا اور پھیلانا سیاسی پوائنٹ سکورنگ کا حربہ ہیں جو قومی مفادات کے سراسر منافی ہیں۔ ملک کی موجودہ معاشی مشکلات لمحہ فکریہ ہیں۔ انہیں ختم کرنے کی کوششیں سب کی ذمہ داری ہے۔
اداریہ پر ایس ایم ایس اور واٹس ایپ رائے دیں00923004647998