ماں کے قتل کے ملزم 10 سالہ بچے کا جسمانی ریمانڈ منظور

February 02, 2023

پنجاب کے شہر گوجرانوالہ میں ماں کے مبینہ قتل کیس میں پولیس نے 10 سالہ بچے کو عدالت میں پیش کیا۔ عدالت نے بچے کو 2 روزہ جسمانی ریمانڈ پر پولیس کے حوالے کر دیا۔

گزشتہ رات مقدمہ مقتولہ کے بھائی کی مدعیت میں درج کیا گیا تھا، مقدمے میں 10 سال کے بچے کے باپ کو بھی نامزد کیا گیا ہے۔

مقدمے کے متن کے مطابق بچے نے باپ کی ایماء پر ماں کو فائرنگ کرکے قتل کیا۔

مقتولہ کی اس کے شوہر سے 8 ماہ قبل علیحدگی ہوگئی تھی۔ 10سالہ بچہ اپنے والد اور بہن، بھائی کے ساتھ رہتا تھا۔

پولیس کے مطابق فرید ٹاؤن میں سگی ماں کو فائرنگ سے قتل کرنے کے بعد بچہ فرار ہورہا تھا کہ محلے داروں نے پکڑ لیا۔

بچے نے برقعہ پہن کر گلی میں اپنی ماں کی ریکی کی اور موقع ملنے پر فائرنگ کرکے قتل کر دیا۔

پولیس کو دیے بیان میں بچے نے بتایا کہ اس کی ماں کے غیر لوگوں سے تعلقات تھے، جس کی وجہ سے اُسے قتل کیا۔ اس نے پستول نواب چوک کے رہائشی ایک دوست سے لیا تھا۔