بالی ووڈ کے مسٹر پرفیکشنسٹ عامر خان کا اپنی بڑی بہن، اداکارہنکہت خان کا کپل شرما شو میں دلچسپ انداز میں تعارف مداحوں کو بھا گیا۔
عامر خان نے کچھ عرصہ پہلے کپل شرما کے شو میں بطور مہمان شرکت کی جہاں ان کی دو بڑی بہنیںنکہت خان اور فرحت خان بھی موجود تھیں۔
اُنہوں نے شو کے دوران اپنی بڑی بہنوں کا دلچسپ انداز میں مداحوں سے تعارف کروایا۔
بھارتی اداکار نے شو میں شرکاء کے درمیان بیٹھی اپنی بہنوں کی طرف اشارہ کرتے ہوئے کہا کہ یہ میری بہنیں فرحت اور نکہت ہیں۔
اُنہوں نے اپنی بڑی بہننکہت خان کی تعریف کرتے ہوئے کہا کہ آپ سب نے فلم ’پٹھان‘ تو دیکھی ہوگی، اس فلم میں ایک خاتون شاہ رخ خان کے بازو پر تعویز باندھ کر کہتی ہیں کہ آج سے تم پٹھان ہو، وہ کردار میری بہن نکہت خان نے ادا کیا ہے۔
جیسے ہی عامر خان نے اپنی بڑی بہن کا تعارف کروایا تو شرکاء نے ان کی بہن کا تالیوں کی گونج سے استقبال کیا۔
واضح رہے کہ نکہت خان بڑی اسکرین پر کم نظر آتی ہیں لیکن اس کے باوجود بھی وہ فلم ’پٹھان‘ سمیت کئی ہٹ فلموں میں اپنی شاندار اداکاری کی جوہر دکھا چکی ہیں۔