چوتھے ٹی ٹوئنٹی میں پاکستان ویمن کرکٹ ٹیم نے ویسٹ انڈیز ویمن کرکٹ ٹیم کو باآسانی 8 وکٹوں سے ہرا کر سیریز میں پہلی کامیابی حاصل کرلی۔
مہمان ٹیم 9 وکٹوں پر 84 رنز تک محدود رہی، سعدیہ اقبال اور ندا ڈار نے تین، تین کھلاڑیوں کو آؤٹ کیا۔
نیشنل بینک کرکٹ ایرینا کراچی میں کھیلے گئے میچ میں پہلے ویسٹ انڈیز ویمن کرکٹ ٹیم نے بیٹنگ کی مگر ہوم ٹیم کی بولرز کے آگے اُن کی ایک نہ چلی۔
ان فارم کپتان ہیلی میتھیوز کے آؤٹ ہوتے ہی دیگر بیٹرز بھی وقفے وقفے سے پویلین پہنچتی رہیں۔ شیمانے کیمبل نے 26 رنز بنائے، سعدیہ اقبال اور ندا ڈار نے تین، تین وکٹیں حاصل کیں۔
پاکستان ویمن کرکٹ ٹیم نے ہدف 21 گیندیں قبل دو وکٹ کے نقصان پر حاصل کرلیا۔
اوپنر عائشہ ظفر 42 اور گل فیروزہ 21 رنز کے ساتھ ناقابل شکست رہیں۔
خیال رہے کہ ویسٹ انڈیز ویمن کے دورہ پاکستان پر یہ ہوم ٹیم کی پہلی کامیابی ہے۔
ون ڈے ٹیم سیریز میں ویسٹ انڈیز ویمن نے 0-3 سے کامیابی سمیٹی جبکہ ابتدائی تین ٹی ٹوئنٹی میچز میں بھی مہمان ٹیم کامیاب رہی۔
سیریز کا پانچواں اور آخری ٹی ٹوئنٹی کل کھیلا جائے گا۔ میچز پاکستان کے پہلے اسپورٹس چینل جیو سوپر سے براہ راست نشر کیے جارہے ہیں۔