وزیراعلیٰ خیبر پختونخوا کے مشیر بیرسٹر محمد علی سیف نے کہا ہے کہ پیراشوٹ گورنر کو بھی جمعرات کے جلسہ عام کی دعوت دیتے ہیں۔
بیرسٹر سیف نے گورنر خیبرپختونخوا فیصل کریم کنڈی کے بیان پر ردعمل دیا اور کہا کہ وزیراعلیٰ اپنےحلقہ ڈی آئی خان جائیں گے اور جلسہ عام سے خطاب بھی کریں گے۔
انہوں نے کہا کہ پیراشوٹ گورنر کو بھی جمعرات کے جلسہ عام کی دعوت دیتے ہیں، فیصل کریم کنڈی کا جلسہ عام میں تعارف بھی ہوجائے گا کہ آپ ڈی آئی خان سے تعلق رکھتے ہیں۔
بیرسٹر محمد علی سیف نے مزید کہا کہ گورنر کےلیے شرط یہ ہے کہ انہیں جلسے میں قیدی نمبر 804 کے نعرے برداشت کرنا ہوں گے۔
ان کا کہنا تھا کہ جلسے میں آپ کو کوئی گندے انڈے اور ٹماٹر بھی نہیں مارے گا، یہ ہماری ذمے داری ہوگی۔
وزیراعلیٰ خیبر پختونخوا کے مشیر نے یہ بھی کہا کہ عوامی مینڈیٹ سے منتخب وزیراعلیٰ اور پیراشوٹ پر آنے والے گورنر میں زمین آسمان کا فرق ہے۔
انہوں نے کہا کہ وزیراعلیٰ علی امین عوامی مینڈیٹ کے منتخب رہنما اور عوام نے آپ کو 4 بار مسترد کیا ہے۔
بیرسٹر سیف نے کہا کہ گورنر پشاور میں اپنے لیے دوست ڈھونڈنے کی کوشش کر رہے ہیں۔