پاکستانی باصلاحت اداکار علی عباس نے ٹک ٹاک پر پابندی عائد کرنے کا مطالبہ کردیا اور ساتھ ہی مطالبہ کیا ہے کہ سوشل میڈیا صارفین کے لیے قوانین و ضابطہ بنائیں۔
حال ہی میں اداکار نے نجی میگزین کے پوڈکاسٹ میں شرکت کی اور مختلف امور پر اپنے خیالات کا اظہار بھی کیا۔
ایک سوال کا جواب دیتے ہوئے انہوں نے کہا کہ آج کل کسی کی بھی سوشل میڈیا پوسٹ پر آکر منفی تبصرہ کرنا بہت آسان ہے اور یہ ہی بات کوئی کسی کے منہ پر نہیں کہہ سکتا کیونکہ پھر اگلا سامنے سے جواب دیگا۔
انہوں نے کہا کہ آج کل لوگ سوشل میڈیا کے پیچھے چُھپ کر ایک دوسرے پر کیچڑ اُچھال رہے ہوتے ہیں۔ نئے آنے والے پھر اسی کیچڑ کو دیکھتے ہیں، کام کو نہیں۔ اس لیے اگر ہمیں ترقی کرنی ہے تو جس طرح حکومت اپنے مفاد کے لیے یوٹیوب یا ایکس پر پابندی عائد کرتی ہے اسی طرح قوم کے مفاد کے لیے ٹک ٹاک پر پابندی عائد کرنا وقت کی ضرورت ہے۔
اداکار نے سوشل میڈیا صارفین کی عمر کا تعین کرنے کے حوالے سے بھی بات کی اور کہا کہ یہ زومبی زون (zombie zine) بن چکا ہے، آنے والی نسل تباہ ہوچکی ہے، اگر ترقی کرنا ہے تو چیک اینڈ بیلینس کی ضرورت ہے، سوشل میڈیا صارفین کے لیے 18 برس کی عمر مقرر کرنے کی ضرورت ہے۔ سوشل میڈیا کی نگرانی کی جائے اور اکاؤنٹ بنانے کے لیے شناختی کارڈ یا پاسپورٹ بطور شناخت کی شرط رکھی جائے۔
علی عباس کے مطابق نوجوان نسل اپنا راستہ کھو کر منفی رجحان میں مبتلا ہو رہی ہے، آج کل جو سوشل میڈیا پر جو مواد بن رہا ہے وہ نامناسب ہے اور دیکھنے کے بھی قابل نہیں ہے۔