بالی ووڈ اداکارہ پرینیتی چوپڑا نے اپنے شوہر اور عام آدمی پارٹی کے رہنما راگھو چڈھا کو بھارتی پارلیمنٹ میں فلم پائیریسی کی روک کےلیے آواز اٹھانے پر اسٹار قرار دیا۔
واضح رہے کہ پرینیتی چوپڑا کے 36 سالہ شوہر راگھو چڈھا بھارتی پنجاب سے پارلیمنٹ کے ایوان بالا (راجیہ سبھا) کے ممبر ہیں۔
راگھو کی جانب سے مذکورہ بالا معاملہ راجیہ سبھا میں اٹھانے پر راجیہ سبھا کے چیئرمین جگدیپ ڈھانگر نے تسلیم کیا کہپرینیتی چوپڑا سے شادی کے بعد راگھو چڈھا کی سیاست میں اہلیہ کے خیالات راسخ ہوگئے ہیں۔
جیسے ہی راگھو اپنا سوال کرکے سیٹ پر بیٹھے توجگدیپ ڈھانگر نے مسکراتے ہوئے کہا کہ یہ تو فلم انڈسٹری کے بارے میں کافی کچھ جانتے ہیں۔ لگتا ہے انھوں نے تجربہ حاصل کرلیا ہے۔
قریب ہی بیٹھیں سینئر اداکارہ اور امیتابھ بچن کی اہلیہ جیا بچن نے بھی اس مسئلے کو اٹھانے پر راگھو کو سراہا۔ جس پر چیئرمین جگدیپ ڈھانگر نے کہا جیا بچن جب سے اس ایوان میں آئی ہیں تب سے وہ بھی اس پر سرگرم ہیں۔
راگھو چڈھا نے جب جواب دینے کی اجازت چاہی تو چیئرمین نے کہا اسکی ضرورت نہیں ہے کیونکہ آپکی ایک لیجنڈ نے توثیق کی ہے، اس موقع پر جیا بچن مسکراتی رہیں۔