پنجاب فوڈ اتھارٹی حکام نے غیر معیاری اور مضر صحت چاکلیٹ بنانے والوں کے خلاف کارروائی کرتے ہوئے 80 ہزار کلوگرام ایکسپائر چاکلیٹ قبضے میں لے کر سپلائیر کو پولیس کے حوالے کر دیا۔
ڈی جی فوڈ اتھارٹی کی سربراہی میں شیخوپورہ روڈ پر کارروائی کرتے ہوئے ایکسپائر چاکلیٹ سے بھرے 2ٹرک اور گودام پکڑا گیا، گودام سے 80 ہزار کلو مال چاکلیٹ کو برآمد کرکے قبضے میں لے لیا گیا۔
ڈی جی فوڈ کے مطابق وسیم اسلم نامی سپلائر ایکسپائر چاکلیٹ نجی پروڈکشن یونٹ سے خرید کر فیصل آباد لے جا رہا تھا جہاں زائد المیعاد چاکلیٹ کو کیمیکل لگا کر فنگس کوختم کر کے دوبارہ پیک کیا جانا تھا۔
ڈی جی فوڈ اتھارٹی عرفان میمن نے بتایا کہ سپلائر کی نشاندہی پر سیال فلور مل کے قریب فیصل آباد روڈپر چاکلیٹ سے بھرے گودام پر چھاپہ مارا گیا۔
حکام نے مکروہ دھندہ کرنے والے جعل سازوں کے خلاف مقدمہ درج کر وا کر سپلائر کو پولیس کے حوالے کر دیا ہے۔