بھارتی فلمساز انوراگ کشیپ کا کہنا ہے کہ ہمیں مودی سرکار کے خلاف جنگ صبر سے لڑنی ہوگی۔
بھارتی میڈیا کی ایک رپورٹ کے مطابق بھارتی فلمساز انوراگ کشیپ نے گزشتہ روز جامعہ ملیہ اسلامیہ یونیورسٹی میں ہونے والے متنازع شہریت قانون کے خلاف احتجاج میں شرکت کی اور وہاں موجود طلبا و طالبات سے خطاب کرتے ہوئے کہا کہ ’ہمیں مودی سرکار کے خلاف جنگ صبر اور استقامت کے ساتھ لڑنی ہوگی۔‘
بھارتی فلمساز انوراگ کشیپ نےجامعہ ملیہ اسلامیہ یونیورسٹی کے طلبا و طالبات سے خطاب کا آغاز کرتے ہوئے ’انقلاب زندہ باد‘ اور ’آواز دو، ہم ایک ہیں‘ کےنعرے لگائے۔
انوراگ کشیپ نے کہا کہ ’مودی سرکار کے اِس متنازع شہریت قانون کے خلاف احتجاج جامعہ ملیہ اسلامیہ یونیورسٹی سے شروع ہوتے ہوئے جواہر لال نہرو یونیورسٹی تک پہنچا اور پھر آہستہ آہستہ پورے بھارت میں پھیل گیا۔‘
بھارتی فلمساز نے کہا کہ ’آج انتے سارے لوگوں کو ایک ہی مقصد کے لیے ایک ساتھ کھڑا دیکھ کر یقین آرہا ہے کہ ہم ایک ہیں۔‘
اُنہوں نے کہا کہ ’بہت عرصے سے ہمیں یوں اپنے حق کے لیے باہر نکلنے کی ضرورت تھی۔‘
اُنہوں نے کہا کہ ’ہمیں مودی سرکار سے اپنا ملک، اپنا حق سب کچھ واپس لینے کی ضرورت ہے اور یہ ہمیں اُسی صورت میں ملے گا جب ہم سڑکوں پر نکلیں گے۔‘
اُنہوں نے کہا کہ ’مودی سرکار کے خلاف یہ جنگ بہت لمبی ہے، یہ جنگ کل ختم نہیں ہوگی، یہ جنگ بھارت میں اگلے الیکشن پر ختم نہیں ہوگی بلکہ یہ چلتی رہے گی۔‘
انوراگ کشیپ نے کہا کہ ’حکومت ہمارے تھکنے کے انتظار میں ہے کہ ہم کب تھک کے واپس اپنے گھروں کو جائیں گے لیکن ہم بھی اُس وقت تک یہاں بیٹھے رہیں گے جب تک کہ مودی سرکار خود ہمارے پاس آکر ہمیں ہمارے اُن سوالوں کے جواب نہیں دے گی، جن سے ہمیں تسلّی ہو۔‘
اُنہوں نے کہا کہ ’جب ہم اِس متنازع شہریت قانون کے خلاف آواز اُٹھانے کے لیے سڑکوں پر آتے ہیں تو ہمیں کہا جاتا ہے کہ آپ کیوں احتجاج کر رہے ہو، یہ قانون بھارتیوں کے لیے نہیں ہے۔‘
بھارتی فلمساز نے کہا کہ ’ہم کیسے یقین کرلیں کہ یہ قانون بھارت میں رہنے والوں کے لیے نہیں ہے کیونکہ حکومت کا ہر ایک نمائندہ مختلف بیان دے رہا ہوتا ہے ہم کس کی بات پر یقین کریں۔‘
اُنہوں نے کہا کہ ’ہمیں مودی سرکار اور اُس کے کسی بھی نمائندے کے بیان پر یقین نہیں ہے بلکہ ہم دیکھنا چاہتے ہیں کہ وہ آخر کیا کرتے ہیں۔‘
اُنہوں نے کہا کہ ’اِس لیے میں کہہ رہا ہوں کہ یہ لڑائی بہت لمبی ہے اور اِس میں ہم سب ساتھ ہیں۔‘
اُنہوں نے کہا کہ ’کچھ لوگوں کے لیے آپ سوچ رہے ہوں گے کہ وہ خاموش ہیں تو وہ ہمارا ساتھ نہیں دے رہے ہیں تو ایسا سوچنا غلط ہے کیونکہ وہ لوگ خاموش رہ کر بھی ہمارا ساتھ دے رہے ہیں۔‘
اُنہوں نے کہا کہ ’یہ احتجاج اُس وقت چلے گا جب تک مودی سرکار اپنا یہ قانون واپس نہیں لے گی۔‘
جامعہ ملیہ اسلامیہ یونیورسٹی کے طلبہ و طالبات سے خطاب کے اختتام پر انوراگ کشیپ نے کہا کہ ’میں بہت دنوں سے آپ لوگوں کے اِس احتجا ج میں شرکت کرنے کا سوچ رہا تھا اور آج یہاں آکر مجھے بہت خوشی ہوئی ہے، آپ لوگوں کی انتی زیادہ تعداد دیکھ کر میں بہت زیادہ خوش ہوا ہوں۔‘
آخر میں اُنہوں نے’آواز دو، ہم ایک ہیں‘ کا نعرہ لگایا۔
واضح رہے کہ گزشتہ کئی ماہ سے بھارت میں متنازع شہریت قانون کے خلاف احتجاجی مظاہرے جاری ہیں اور بھارتی فلمساز انوراگ کشیپ اِس قانون کے خلاف اکثر مقامات پر آواز اُٹھاتے نظر آتے ہیں جس کی وجہ سے وہ اکثر بھارتیوں کی تنقید کاشکار رہتے ہیں۔