بینکاک میں پھنسے پاکستانی مسافروں کو وطن واپس لانے کے لیے حکومت پاکستان کی جانب سے تھائی ائیر ویز کو اسلام آباد تک ایک فلائٹ آپریشن کی اجازت دینے کے باوجود ایئرلائن نے سو سے زائد پاکستانیوں کو بورڈنگ پاس دینے سے انکار کردیا ہے۔
مسافروں کے مطابق گزشتہ روز حکومت پاکستان کے اعلان کے بعد رابطہ کرکے ایئر لائن نے بھاری رقوم کے عوض ان کے ٹکٹ تبدیل کروائے اور آج جب وہ بینکاک ائیرپورٹ پہنچے تو عملے نے حکومت پاکستان کی اجازت نہ ہونے کا کہہ کر انہیں بورڈنگ پاس دینے سے انکار کر دیا ہے۔
شیڈول کے مطابق یہ خصوصی پرواز جس میں 175 مسافر ہوں گے 28 مارچ 2020 کی رات 2210 بجے اسلام آباد انٹرنیشنل ائیر پورٹ پر پہنچے گی۔
ایئرپورٹ پر موجود مسافروں کے مطابق انہوں نے کئی بار کورونا وائرس نہ ہونے کے سرٹیفیکٹ بنوائے ہیں۔
ان کے پاس اب تازہ سرٹیفیکٹ بھی موجود ہیں مگر خواتین اور بچوں سمیت ان ایک سو مسافروں کو ایک بار پھر مشکل کا سامنا کرنا پڑ رہا ہے۔