خیبر پختونخوا کے علاقے دیر بالا میں جنگل کی ملکیت کے تنازع پر دو مخالف گروپوں میں فائرنگ سے 10 افراد جاں بحق اور متعدد زخمی ہوگئے۔
ڈسٹرکٹ پولیس آفیسر (ڈی پی او) میاں نصیب جان کے مطابق علاقہ چراگئی میں دو گروپوں میں جنگل کی ملکیت پر تنازع تھا۔
انہوں نے کہا کہ دونوں فریق علاقے میں ایک شخص کے جنازہ میں شریک تھے کہ نماز جنازہ کے بعد دونوں گروپوں میں تلخ کلامی ہوگئی اور ایک دوسرے پر فائرنگ کردی۔
ڈی پی او نے بتایا کہ فائرنگ سے 10 افراد جاں بحق اور متعدد زخمی ہوگئے۔
انہوں نے مزید بتایا کہ زخمیوں کو ڈسٹرکٹ اسپتال منتقل کردیا گیا، جبکہ علاقے میں سخت کشیدگی ہے اور پولیس کی بھاری نفری کو تعینات کردیا گیا ہے۔