بیروت میں دھماکوں کے تناظر میں ہونے والے پُرتشدد احتجاجی مظاہروں کے بعد لبنان کے وزیرِاعظم نے کابینہ سمیت استعفیٰ دے دیا۔
لبنانی وزیراعظم عوامی مطالبے پر استعفیٰ صدر مائیکل عون کو پیش کریں گے۔
عوام سے خطاب میں حسن دیاب نے کہا کہ 7 سالوں سے بندرگاہ کے گودام میں حساس دھماکا خیز مواد کی موجودگی بندرگاہ حکام کی کرپشن کو ظاہر کرتی ہے۔
انہوں نے مزید کہا کہ دھماکے اسی کرپشن کا نتیجہ ہیں، سانحے کے ذمے داروں کو انجام تک پہنچانے اور حکومت نظام میں حقیقی تبدیلی کے مطالبات میں عوام کے ساتھ ہیں۔
اس سے قبل کابینہ اجلاس میں وزیرِ اطلاعات، وزیر ماحولیات، وزیرِ انصاف اور وزیر مالیات سمیت پارلیمان کے 9 ارکان مستعفیٰ ہوگئے تھے۔
مستعفیٰ ہونے والے وزراء نے باقی وزیروں کے بھی استعفیٰ پر زور دیا جس کے بعد وزیرِاعظم سمیت کابینہ نے حکومت چھوڑنے کا فیصلہ کیا۔
4 اگست کو دارالحکومت بیروت میں ہونے والے دھماکوں میں 163 افراد جاں بحق اور 6 ہزار زخمی ہوئے تھے جبکہ بے گھر ہونے والوں کی تعداد 3 لاکھ ہے۔