پاکستان پیپلز پارٹی کی سینئر رہنما شیری رحمان کا گلگت بلتستان میں احتجاج کے دوران سیل ہونے والے پی پی کے دفاتر سے متعلق کہنا ہے کہ پیپلز پارٹی کے دفاتر کس بنیاد پر سیل کیے جا رہے ہیں؟۔
شیری رحمان نے گلگت بلتستان میں پیپلز پارٹی کے احتجاج کے دوران کارکنان کی گرفتاری پر مذمت کرتے ہوئے کہا ہے کہ ہمارہ الیکشن چوری ہوا، لوگوں کا ووٹ چوری ہوا، دھاندلی کے خلاف پر امن احتجاج ہمارہ آئینی حق ہے۔
شیری رحمان نے کہا ہے کہ الیکشن کے بعد گلگت بلتستان میدان جنگ بنا ہوا ہے، تحریک انصاف دھاندلی چھپانے کے لیے گلگت بلتستان میں انتشار پھیلا رہی ہے۔
انہوں نے مزید کہا کہ پیپلزپارٹی کے کارکن پر امن ہیں، ہنگامے تحریک انصاف کے کارکنان کر رہے ہیں، حکومت شر پسندی میں ملوث افراد کو گرفتار کرے، ہمارے کارکنان کو نہیں۔
شیری رحمان کا کہنا تھا کہ دھاندلی چھپانے کے لیے گلگت بلتستان کا امن خراب نہیں ہونے دیں گے، تباہی سرکار ہوش کے ناخن لے،وفاقی وزراء جی بی میں غنڈہ گردی بند کریں۔