الیکشن کمیشن نے یوسف گیلانی کیخلاف پی ٹی آئی کی درخواست منظور کرلی

March 08, 2021

الیکشن کمیشن آف پاکستان نے سابق وزیراعظم اور نو منتخب سینیٹر یوسف رضا گیلانی سے متعلق حکمران جماعت تحریک انصاف کی جلد سماعت کی درخواست منظور کرلی ہے۔

الیکشن کمیشن کے اعلامیے کے مطابق پی ٹی آئی کے رکن قومی اسمبلی فرخ حبیب و دیگر کی یوسف رضا گیلانی سے متعلق درخواست پر کل سماعت ہوگی۔

پی ٹی آئی کی جلد سماعت کی درخواست میں کہا گیا کہ یوسف رضا گیلانی چیئرمین سینیٹ کے امیدوار ہیں، جس کا انتخاب 12 مارچ کو شیڈول ہے۔


درخواست میں مزید کہا گیا کہ الیکشن کمیشن نے 11 مارچ کو کیس سماعت کے لیے مقرر کر رکھا ہے، مناسب ہوگا کہ وقت ضائع کیے بغیر کیس کی فوری سماعت کی جائے۔

فرخ حبیب، کنول شوزب اور ملیکہ بخاری کی دائر درخواست میں کہا گیا کہ پہلی بار ہوا کہ چیئرمین سینیٹ کا امیدوار انتخابی بدعنوانی کا مرتکب قرار پایا۔