مسلم لیگ نون پنجاب کے صدر رانا ثناء اللّٰہ نے قومی اسمبلی میں قائدِ حزبِ اختلاف اور نون لیگ کے صدر میاں شہباز شریف کی رہائی پر خوشی کا اظہار کرتے ہوئے کہا ہے کہ مسلم لیگ نون کے لیے آج بڑا دن ہے۔
مسلم لیگ نون پنجاب کے صدر رانا ثناء اللّٰہ صدر مسلم لیگ نون شہباز شریف کو لینے کے لیے جیل پہنچے، اس موقع پر انہوں نے جیل کے باہر میڈیا سے گفتگو کرتے ہوئے اظہارِ خیال کیا۔
انہوں نے کہا کہ انتقام پر مبنی پراپیگنڈہ زمین بوس ہو گیا ہے، شہباز شریف رہائی کے بعد اپوزیشن کا کردار ادا کریں گے۔
رانا ثناء اللّٰہ کا مزید کہنا ہے کہ ملک کو اس وقت شہباز شریف کی بہت ضرورت ہے، شہباز شریف پی ڈی ایم کے اجلاس میں نون لیگ کے صدر کی حیثیت سے شرکت کریں گے۔
مسلم لیگ نون پنجاب کے صدر کا یہ بھی کہنا ہے کہ مریم نواز اور شہباز شریف دونوں پی ڈی ایم کے اجلاس میں شرکت کریں گے۔