قومی کرکٹ ٹیم کے سابق فاسٹ بولر شعیب اختر کا کہنا ہے کہ شاہین شاہ آفریدی نے معافی مانگ کر اچھا کیا لیکن سرفراز اس سے زیادہ احترام کے مستحق ہیں۔
انہوں نے شاہین شاہ آفریدی کے سرفراز احمد سے معافی مانگنے کے ٹوئٹ پر ردعمل دیتے ہوئے کہا کہ سرفراز اس سے زیادہ احترام اور عزت کا مستحق ہے۔
شعیب اختر نے لکھا کہ ’سرفراز پاکستان کرکٹ کے ایک کامیاب اور بہترین کپتان ہیں۔‘
ساتھ ہی انہوں نے شاہین شاہ آفریدی کے معافی مانگنے کے اقدام پر بھی انہیں سراہا اور کہا کہ ہمیں آپ پر فخر ہے۔
سرفراز احمد سے جھگڑے پر شاہین آفریدی نے افسوس کا اظہار کرتے ہوئے معذرت کی اور کہا کہ سرفراز ہم سب کا فخر ہیں، وہ میرے کپتان تھے اور ہمیشہ رہیں گے۔
شاہین آفریدی کا کہنا تھا کہ مجھے سرفراز احمد کو عزت دیتے ہوئے خاموش ہوجانا چاہیے تھا۔