اسلام آباد(جنگ نیوز) وفاقی وزیر اطلاعات فواد چوہدری کا کہنا ہے کہ نوازشریف کو جیل میں رکھنا نہیں قومی دولت واپس لینا چاہتے ہیں ،نوازشریف ہمارے پیسے واپس کریں اور جہاں مرضی چلے جائیں۔ گلگت بلتستان میں لوکل گورنمنٹ کی تشکیل کی ضرورت،تاریخی بجٹ پیش کیا،اسکردو میں پریس کانفرنس کرتے ہوئے وفاقی وزیر اطلاعات فواد چوہدری کا کہنا تھا کہ احتساب کے عمل کو منطقی انجام تک پہنچانا ہے۔ن لیگ حکومت نے گلگت بلتستان کے لیے کچھ نہیں کیا، سڑکوں کی خراب حالت سابق حکومت کی نااہلی کا ثبوت دے رہی ہیں، گلگت بلتستان میں لوکل گورنمنٹ کی تشکیل کی ضرورت ہے، ہم نے عوام دوست اور تاریخی بجٹ پیش کیا، اور یہاں کی ترقی کے لیے سب سے بڑا حصہ ہماری حکومت نے دیا، گلگت بلتستان کو عبوری آئینی صوبہ بنانے جارہے ہیں، اس معاملے پر تیزی سے پیش رفت ہورہی ہے، سیاحت کہ ترقی کے لیے جتنی فلائٹس چلائی جارہی ہیں ماضی میں مثالیں نہیں ملتی۔وفاقی وزیر نے کہا کہ ہم امن کے لیے سنجیدہ ہیں، اور بھارتی وزیراعظم مودی کی کشمیر پالیسی اور عالمی قوانین کی خلاف ورزی کی مذمت کرتے ہیں، کشمیر کاز کے لیے ہم نے اقتصادی قربانیاں بھی دی ہیں۔