لوٹن ( نمائندہ جنگ) آزاد کشمیر کے انتخابات 5 سے 10 سال تک ملتوی کر کے آزاد کشمیر اور گلگت و بلتستان پر مشتمل قومی حکومت کا قیام عمل میں لایا جائے، یہ مطالبہ جے کے ایل ایف کے ایک ہنگامی ورچوئل اجلاس میں کیا گیا، جے کے ایل ایف کے مرکزی انفارمیشن آفس سے جاری ایک بیان کے مطابق مظفرآباد سے پارٹی کی مرکزی کنویننگ کمیٹی کے سربراہ خواجہ سیف الدین کی زیرصدارت پارٹی کے عہدیداروں اور کچھ سینئر رہنماؤں کی آن لائن میٹنگ میں آئندہ ماہ اے جے کے، کے الیکشن کے بارے میں حکمت عملی مرتب کی گئی، اجلاس کے دیگر شرکاء میں سفارتی بیورو کے چیئرمین پروفیسر راجہ ظفر خان (یوکے) ، سابق وائس چیئرمین سلیم ہارون (راولپنڈی) ، سیکرٹری سنٹرل کنویننگ کمیٹی سردار جاوید حنیف (راولاکوٹ)، ساجد صدیقی (راولپنڈی) ، سابق صدر شمالی امریکہ حلیم خان (امریکہ) ، سابق مرکزی وزیر خزانہ خواجہ منظور احمد چشتی (مظفرآباد) ، سابق یوکے زونل صدر صابر گل ، کنوینر یورپ زون ملک مشتاق پاشا فرانس، کنوینر مشرق وسطیٰ زون سردار عابد (یو اے ای) ، کنوینر یوکے زون چوہدری محمد یوسف ، کنوینر شمالی امریکہ مختار احمد راجہ (یو ایس اے) ، سابق سکریٹری خزانہ یوکے زون سنور حسین، سیکرٹری یورپ زون سردار ظہیر زاہد (بلجیم) ، سکریٹری یوکے زون تنویر ملک اور مرکزی ترجمان محمد رفیق ڈار شامل تھے۔محمد رفیق ڈار نے اجلاس کی کوآرڈینیشن کی جبکہ مرکزی پارٹی کے رہنما اور جے کے ایل ایف کے جے جے بی کے زونل کنوینر راجہ حق نواز خان (کوٹلی) ، پارٹی کے سینئر رہنما ضیاء الحق (گلگت) ، پارٹی کے سینئر رہنما اشرف گلشن (USA) اور چیئرمین جے کے ایس ایل ایف ملک عبدالرحیم ایڈووکیٹ ناگزیر مصروفیات کی وجہ سے میٹنگ میں شریک نہیں ہوسکے۔ بیان کے مطابق خواجہ سیف الدین نے اجلاس کے شرکاء سے خطاب کرتے ہوئے کہا کہ جموں کشمیر کی جدوجہد آزادی کی موجودہ صورتحال کے پیش نظر ، آئندہ 5 سے 10 سال کے لئے اے جے کے اسمبلی انتخابات معطل کرنے کی ضرورت ہے۔ AJK-GB کی مشترکہ قومی انقلابی حکومت کا قیام وقت کی ضرورت ہے، انہوں نے مزید کہا کہ اس سے ہمارا مقصد قومی آزادی کی جدوجہد کو آگے بڑھانا ہے، جے کے ایل ایف ریاست میں عوام کی آگاہی مہم کو تیز کرے گی۔ اجلاس میں متفقہ فیصلہ کیا گیا کہ عوامی اجتماعات، احتجاجی مظاہروں اور پارٹی کارنر میٹنگز کے انعقاد کے علاوہ ریاست کے عوام کو ان انتخابات کے حتمی مقاصد اور تفصیل کے انعقاد کے ذریعے آزادی جدوجہد پر ان کے منفی اثرات سے بھی آگاہ کیا جائے گا۔ پریس کانفرنسیں ، لٹریچر کی تقسیم اور سوشل میڈیا کے استعمال سے دوسرے دستیاب پلیٹ فارمز کے ذریعے آواز بلند کی جائے گی، اس موقع پر پارٹی کے کارکنوں کی جانب سے تیزی سے تنظیم نو مہم کی تعریف کرتے ہوئے خواجہ سیف الدین نے مختلف زونوں اور مختلف سطحوں پر نومنتخب عہدیداروں سے نیک خواہشات کا اظہار کیا۔