موسمِ گرما شروع ہوتے ہی بجلی کی شدید لوڈ شیڈنگ کا سلسلہ شروع ہوگیا جو اب کسی حد تک قابو میں ہے لیکن ہر سال گرمیوں کے موسم میں عوام کو بجلی کی شدید لوڈ شیڈنگ کا سامنا کرنا پڑتا ہے جس سے نہ صرف لوگوں کیلئے کاروبار کرنا مشکل تر ہو جاتا ہے بلکہ گھریلو زندگی بھی متاثر ہوتی ہے۔ وسائل کی کمیابی تو رہی ایک طرف اِس لوڈ شیڈنگ کی سب سے بڑی وجہ بجلی کی قومی پالیسی کا نہ ہونا تھا۔ اِس مسئلے کے حل کے لئے مشترکہ مفادات کونسل نے نیشنل الیکٹریسٹی پالیسی 2021کی منظوری دے دی ہے۔یہ منظوری پیر کو وزیر اعظم عمران خان کی زیر صدارت ہونے والے اجلاس میں دی گئی جس میں چاروں صوبوں کےوزرائے اعلیٰ اور رکن وفاقی وزراء نے شرکت کی۔ اِس موقع پر وفاقی وزیر برائے توانائی حماد اظہر نے کہا کہ یہ پالیسی 10 سال کیلئے ہے جو صوبوں کے اتفاق رائے سے بنائی گئی ہے جس کے تحت سستی اورماحول دوست بجلی حاصل ہو گی۔ نئی پالیسی کی روشنی میں ذیلی شعبوں کیلئے 10سے 12پالیسیاں تشکیل دی جائیں گی جن کے تحت مختلف منصوبوں پر کا م کیا جائے گا ۔ ہمارے ملک میں روزانہ ہزاروں میگا واٹ بجلی ٹرانسمیشن کے فرسودہ نظام کی نذر ہو جاتی ہے۔ اِس ادارے کو گردشی قرضوں کا چیلنج بھی در پیش ہے۔ماضی میں کئے گئے مہنگے معاہدوں کے باعث بجلی بھی مہنگی ہے۔ایک معمولی تنخواہ لینے والا شخص بجلی کا بِل پورا کرے یا اپنا گھر چلائے؟ مشترکہ مفادات کونسل میں منظور ہونے والی نیشنل الیکٹریسٹی پالیسی اِس حوالے سے ایک احسن اقدام ہے جس سے ہماری آنے والی نسلوں کو سستی اور ماحول دوست بجلی مہیا ہوگی۔اگر ایسی پالیسی دو عشرے قبل نافذ کر لی جاتی تو آج ہم بجلی کے اِس بحران سے دو چار نہ ہوتے۔ اُمید کی جانی چاہئے کہ نیشنل الیکٹریسٹی پالیسی کو جلد از جلد نافذ العمل کر کے بجلی کے موجودہ بحران پر قابو پا لیا جائے گا۔
اداریہ پر ایس ایم ایس اور واٹس ایپ رائے دیں00923004647998