ارسلان اللہ خان
بس یہی زندگی کی ہیڈنگ ہے
لوڈشیڈنگ ہی لوڈشیڈنگ ہے
یوپی ایس اپنا ہورہا ہے خراب
روز افزوں یہ دے رہا ہے جواب
جنریٹر کا ہوا تیل بھی ختم
ہوگیا اس کا آج کھیل بھی ختم
اتنی بجلی گئی ہے میرے یار
اب تو سولر بھی ہوگیا بے کار
ختم اب بیٹری موبائل کی
اپنی حالت ایک سائل کی
بند ہے لیپ ٹاپ بھی اپنا
چارجنگ بن گئی ہے اِک سپنا
آن لائن کلاس لوں کیسے
وقت تعلیم کو مَیں دوں کیسے
گرم موسم ہے اور پسینہ ہے
کیا اسی طور ہم کو جینا ہے؟
ارسلاںؔ یہ سوال ہے اپنا
کون پُرسانِ حال ہے اپنا؟