امریکہ: مسجد میں دھماکہ کرنے والے کو 53 سال قید، ملزم نے ساتھیوں کے ہمراہ مسجد پر حملہ کیا تھا

September 16, 2021

بلومنگٹن(صباح نیوز) امریکا میں 2017کو نماز فجر کے وقت مسجد کے باہر دھماکا کرنے والے مقامی ملیشیا گروپ کے سربراہ ایمیلی کلائر کو 53 سال قید کی سزا سنائی گئی ہے۔ غیر ملکی خبر رساں ادارے کے مطابق امریکی ریاست منیسوٹا کی عدالت نے بلومنگٹن کی مسجد دارالفاروق اسلامک سینٹرمیں پائپ دھماکا کرنے کا الزام ثابت ہونے پر 50 سالہ مجرم ایمیلی کلائر کو 53سال قید کی سزا سنائی ہے۔عدالت میں پراسیکیوٹرز نے بتایا تھا کہ ایمئیلی کلائر نے دو افراد کو اپنے ملیشیا گروپ دی وائٹ ریبٹس میں شامل کیا تھا اور یہ تینوں 5اگست 2017کو پِک اپ ٹرک پر 805 کلومیٹر کی مسافت طے کرکے اسلامک سینٹر پہنچے اور پائپ دھماکا کیا۔پراسیکیوٹر کا مزید کہنا تھا کہ اس دھماکے میں کوئی جانی نقصان نہیں ہوا تھا تاہم اس حملے کا مقصد مسلم کمیونیٹی کو ہراساں کرنا تھا اور انھیں عدم تحفظ کا احساس دلانا تھا جو ریاست کے لیے ناقابل قبول ہے۔واضح رہے کہ دھماکے کے بعد ہونے والی تفتیش کے نتیجے میں ایف بی آئی ایجنٹوں نے مرکزی ملزم کو دو ساتھیوں سمیت مارچ 2018 میں گرفتار کیا تھا اور جنوری 2018میں جرم ثابت ہوگیا تھا۔