لیجنڈری کامیڈین و اداکار عمر شریف کو امریکا روانگی کے لیے نجی اسپتال سے ڈسچارج کر کے ایئرپورٹ پر ایئر ایمبولینس تک پہنچا دیا گیا ہے۔
عمر شریف کے ہمراہ ایئر ایمبولینس کی میڈیکل ٹیم بھی ہے، عمر شریف کی اہلیہ زریں غزل بھی ایئرایمبولنس میں ساتھ سفر کریں گی۔
عمر شریف اہلیہ زریں غزل ایئرپورٹ پہنچ گئیں، روانگی کی فہرست میں نام موجود ہے، انہوں نے امیگریشن بھی کروا لی ہے۔
اس سے قبل امریکا روانگی کے لیے ایئر ایمبولنس کے عملے کو عمر شریف کا انتظار تھا۔
سول ایوی ایشن ذرائع کے مطابق ایئر ایمبولینس آج 11 سے ساڑھے گیارہ بجے کے درمیان عمر شریف کو لے کر کراچی سے امریکا روانہ ہوجائے گی۔
دوسری جانب عمر شریف کے صاحبزادے جواد عمر نے اپنے ایک بیان میں کہا کہ ڈاکٹروں کی ٹیم والد کا معائنہ کر رہی ہے، گزشتہ روز بلڈ پریشر بڑھ جانے پر ان کی حالت آؤٹ آف کنٹرول ہو گئی تھی۔
گزشتہ روز عمر شریف کو علاج کے لیے امریکی دارالحکومت واشنگٹن لے جانے کے لیے ایئر ایمبولنس کراچی پہنچی تھی۔
سول ایوی ایشن ذرائع کے مطابق فلائٹ آئی ایف اے 1264 فلپائن کے منیلا ایئرپورٹ سے کراچی آئی۔