برطانوی ریفرنڈم کے بعد کرنسی اور حصص بازاروں میں بھونچال

برطانیہ میں تاریخی ریفرنڈم نے دنیابھر میں ہلچل مچا دی، کرنسی مارکیٹ میں بھونچال آگیا،پاکستان میں اوپن مارکیٹ میں برطانوی پاؤنڈ 15 روپے اور یورو ساڑے تین روپے سستا ہوگیا جبکہ پاکستان اسٹاک ایکس چینج میں سرمایہ کاروں کے 200ارب روپے ڈوب گئے۔

برطانیہ میں تاریخی ریفرنڈم کے نتائج نے پوری دنیا کی فنانشل مارکیٹ میں بھونچال مچادیا ، برطانوی عوام نے فیصلہ سنا دیاکہ برطانیہ اب یورپی یونین کا حصہ نہیں رہے گا۔

ماہر معیشت مزمل اسلم کا کہنا کہ اس خبر کا فنانشل مارکیٹ میں شدید ردعمل دیکھا گیا ہے، کرنسی مارکیٹ میں شدید مندی کے ساتھ پاکستان اسٹاک ایکس چینج کی مندی نے سرمایہ کاروں کے 200 ارب روپے ہڑپ کرلئے۔

ایکس چینج کرنسی ایسوسی ایشن کے جنرل سیکریٹری ظفر پراچہ کا کہنا ہے کہ کاروبار کے دوران پاؤنڈ 15 روپے اور یورو ساڑھے تین روپے سستا ہوگیا، اگر یہ سلسلہ جاری رہا تو برآمدات پر منفی اثرات مرتب ہوں گے۔

برطانوی وزیر اعظم نے اپنی رائے کو عوام کی جانب سے مسترد کرنے پر عہدہ چھوڑنے کا اعلان کردیا ہے، اس خبر پر ماہرین فنانشل مارکیٹس میں ریکوری دیکھ رہے ہیں۔