اسلام آباد ہائی کورٹ نے جائیداد کی خریدوفروخت میں کروڑوں روپے کا فراڈ کرنے والے ملزم وقاص کی ضمانت قبل از گرفتاری کی درخواست مسترد کر دی تاہم ملزم کے عدالت میں پیش نہ ہونے پر گرفتاری عمل میں نہیں آ سکی۔
اسلام آباد ہائی کورٹ کے جسٹس محسن اختر کیانی نے ملزم وقاص کی جانب سے ضمانت قبل از گرفتاری کی درخواست پر سماعت کی تو مدعی مقدمہ کے وکیل خرم محمود نے درخواست ضمانت منظور نہ کرنے کی استدعا کرتے ہوئے کہا کہ ملزم نے اس کے موکل ڈاکٹر زبیر سے1کروڑ 30لاکھ روپے کا فراڈ کیا ۔
ملزم عادی مجرم ، فراڈ کے مختلف مقدمات میں نامزد اور اشتہاری بھی ہے جو کئی مرتبہ عدالت سے فرا رہو چکا ہے۔ ملزم کے وکیل کا کہنا تھا کہ وہ اپنے والد کے اسپتال میں داخل ہونے کے باعث آج پیش نہیں ہو سکا۔
عدالت نے دلائل سننے کے بعد ملزم کی درخواست ضمانت خارج کر دی۔