نو منتخب وزیراعلیٰ سندھ مراد علی شاہ کی بلاول بھٹو سے ملاقات

سندھ کے نو منتخب وزیراعلیٰ سید مراد علی شاہ نے پاکستان پیپلزپارٹی کے چیئرمین بلاول بھٹو زرداری سے بلاول ہاؤس میں ملاقات کی اور پارٹی قیادت کی جانب سے سندھ کے چیف ایگزیکٹیو کے طور پر خدمات کے لیے ان پر اعتماد کرنے کا شکریہ ادا کیا انہوں نےیقین دلایا کہ وہ اپنی تمام قابلیت اور توانائی کو بروئے کار لاتے ہوئے سندھ کو ملک کا بہترین صوبہ بنانے کے لیے ہر ممکن کوشش کریں گے۔

بلاول ہاؤس میں ہونے والی ملاقات میں بلاول بھٹو زرداری نے سبکدوش ہونے والے وزیراعلیٰ سندھ سید قائم علی شاہ کی ان کے تمام سیاسی کیریئر میں محنت اور وفاداری کوبھی سراہا اور کہا کہ پارٹی کارکنان اور رہنما پارٹی کا اہم اثاثہ ہونے پر ان کو خراج تحسین پیش کریں۔

بلاول بھٹو زرداری نے نو منتخب وزیراعلیٰ سندھ سید مراد علی شاہ کو ہدایت کی کہ وہ سندھ میں انفرااسٹرکچر کی ترقی، تعلیم ، صحت اور امن امان پر زیادہ توجہ دے۔ اس موقع پر نو منتخب وزیراعلیٰ سندھ سید مراد علی شاہ نے پیپلزپارٹی کے چیئرمین کو یقین دلایا کہ وہ اپنے والد مرحوم سید عبداللہ شاہ ، اپنے سابقہ ہم منصب سید قائم علی شاہ اور دیگر سینئر رہنماؤں کی کارکردگی سے گائیڈ لائین لینے کی کوشش کروں گا۔

انھوں نے مزید کہا کہ میں اپنی قابلیت، تخلیقی قوت، محنت اور ذمیداری کے ساتھ پیپلزپارٹی کے پرچم تلے سندھ کے عوام کی خدمت اور ان کی توقعات پر پورا اترنے کے لیے تجدیدانہ آئیڈیاز استعمال کروں گا۔