اقوام متحدہ میں پاکستان کی مستقل مندوب ڈاکٹر ملیحہ لودھی کا کہنا ہے کہ پاکستان جوہری عدم پھیلائو کی ذمہ داریاں احسن طریقے سے پوری کررہا ہے ۔ پاکستان اس بات کا اہل ہے کہ اسے نیوکلیئر سپلائر گروپ کا رکن بنایا جائے۔
ان خیالات کا اظہار انہوں نے سلامتی کونسل کے زیر اہتمام ایک مباحثے سے خطاب میں کیا ۔ ڈاکٹر ملیحہ لودھی کا کہنا تھا کہ وقت آگیا ہے کہ جوہری ٹیکنالوجی کے عدم پھیلائو پر مل کر کام کرنا ہوگا ۔ ان کا مزید کہنا تھا کہ تخفیف اسلحہ اور جوہری عدم پھیلائو ایک دوسرے سے منسلک ہیں۔
انہوں نے کہا کہ اس حوالے سے پاکستان سلامتی کونسل کی قراردادوں پر کامیابی سے عمل پیرا ہے اور اپنی ذمہ داریاں بخوبی نبھارہا ہے ۔
انہوں نے بتایا کہ پاکستان نے اپنے ایٹمی ہتھیاروں کی حفاظت کے لیے ایک موثر اور جامع نظام اپنا رکھا ہے اور پاکستان نے ایٹمی ہتھیاروں کے مزید تجربات پر از خود پابندی اپنا رکھی ہے اور امید رکھتے ہیں کہ بھارت بھی ایسا ہی کرے گا ۔
ڈاکٹر ملیحہ لودھی نے اس موقع پر سلامتی کونسل سے خطاب میں مطالبہ کیا کہ پاکستان کا ریکارڈ اسے اہل بناتا ہے کہ اسے نیوکلیئر سپلائر گروپ کا رکن بنایا جائے ۔