ٹی او آرزکمیٹی اپنی موت آپ مر گئی، شاہ محمود قریشی

پاکستان تحریک انصاف کے رہنما شاہ محمود قریشی کا کہنا ہے کہ حکومت کی ہٹ دھرمی کے باعث ٹی او آر کمیٹی اپنی موت آپ مر گئی، ٹی او آرز مردہ گھوڑا ہے، اب ا س کی ضرورت نہیں رہی۔

اعتزاز احسن کا کہنا ہے کہ پاناما لیکس کی تحقیقات کا آغاز وزیراعظم اور ان کے خاندان سے ہونا چاہیے، پیپلز پارٹی سپریم کورٹ نہیں جائے گی، پی ٹی آئی کی پٹیشن کی حامی ہے۔

تحریک انصاف کے وائس چیئرمین شاہ محمود قریشی نے قومی اسمبلی اور سینیٹ میں اپوزیشن لیڈرز کے ساتھ ملاقات کے بعد کہا کہ اعتزاز احسن نے اپوزیشن جماعتوں کی مشاورت سے پاناما لیکس کی تحقیقات کے لیے ٹی او آر کا مسودہ تیار کیا، پی ٹی آئی اس کی تائید کرتی ہے، تحریک انصاف سمجھتی ہے کہ ٹی او آرز کمیٹی مردہ گھوڑا ہے، اب اس کی ضرورت نہیں رہی۔

پاناما لیکس کے معاملے پر خیبر پختونخوا اسمبلی میں قرارداد لانے کی ہدایت دے دی ہے، پیپلز پارٹی سے درخواست ہے کہ یہ قرارداد سینیٹ اور سندھ اسمبلی میں بھی پیش کی جائے۔

شاہ محمود قریشی نے کہا کہ پیپلز پارٹی کو 3 ستمبر کے مارچ میں شرکت کی درخواست کی ہے،اعتزاز احسن نے کہا کہ اس حوالے سے پارٹی قیادت فیصلہ کرے گی، پاناما لیکس کے حوالے سے سب کا بلاامتیاز احتساب ہونا چاہیے۔

انہوں نے کہا کہ ضابطہ کار وزیراعظم یا ان کی ٹیم خود بنائے ایسا ممکن نہیں، پارلیمنٹ میں ایک یا دو روز میں پاناما لیکس کی تحقیقات کا بل پیش کردیں گے، پیپلز پارٹی سپریم کورٹ میں نہیں جائے گی، تحریک انصاف کی دائر پٹیشن کی حمایت کرتی ہے۔

قومی اسمبلی میں اپوزیشن لیڈر سید خورشید کا کہنا تھا کہ ایم کیو ایم کے قائد نے پاکستان کے خلاف جو بات کی اس پر پارلیمنٹ میں قرارداد لانا چاہتے ہیں، وسیم اختر کراچی کے میئر ہیں کراچی کے میئر ہی رہیں گے۔