کول مائن کرپشن :گوہر اللہ گرفتار، قائم علی شاہ کو نوٹس جاری

سندھ کے کوئلے میں عجب کرپشن کی غضب کہانی، نیب نے لاکھڑا کول مائن کرپشن اسکینڈل پر ہاتھ ڈالا تو پنڈورا بکس کھل گیا، 2ارب روپے سے زائد کی کرپشن کے کیس میں 3نام قائم علی شاہ سہیل اکبر شاہ اور گوہر اللہ سامنے آگئے۔

گوہر اللہ گرفتار ہیں، سہیل اکبر شاہ ضمانت پر جبکہ قائم علی شاہ کو نوٹس جاری کردیا گیا ہے، نیب کے مطابق ٹھیکہ لینے والی کمپنی نے 2ارب روپے کا کوئلہ بیچا مگر بجلی گھر نہ لگایا۔

نیب کے مطابق لاکھڑاکول مائنز کا 2ارب روپے سے زائد کوئلہ ٹھیکہ لینے والی کمپنی نے بیچ کھایا، ٹھیکہ اس وقت کے وزیر اعلیٰ سندھ قائم علی شاہ کے زبانی حکم پر سہیل اکبرشاہ نے گوہراللہ کو دیا، سہیل اکبر شاہ اس وقت وزیراعلیٰ قائم علی شاہ کے پرنسپل سیکریٹری تھے ۔

نیب کے مطابق لاکھڑا کول مائنز کا ٹھیکہ 2009-10ءمیں غیرقانونی طور پردیا گیا،لاکھڑا کول مائنز کا لیز 200میگاواٹ کا بجلی گھر قائم کرنے کے لیے دیا گیا تھا۔

سہیل اکبرشاہ نے سندھ ہائیکورٹ سے عبوری ضمانت کرالی ، نیب نے عبوری ضمانت کے خلاف سندھ ہائی کورٹ سے رجوع کر لیا۔

اس حوالے سے قائم علی شاہ کے پرنسپل سیکریٹری سہیل اکبرشاہ کا کہنا ہے کہ انہوں نے صرف وزیراعلیٰ کے زبانی احکام آگے بڑھائے تھے،نیب نے صرف وزیراعلیٰ کا تحریری حکم نہ لینے پر الزام لگایا ہے۔

سہیل اکبرشاہ کا یہ بھی کہنا ہے کہ انہیں روزانہ سیکڑوں ہدایات فون پر ملتی تھیں۔

لاکھڑا کول مائنز کرپشن کا تیسرا کردار گوہراللہ نیب کی حراست میں آگیا ، نیب نے گوہراللہ کو گزشتہ ہفتے کراچی کے ہوٹل سے حراست میں لیا ۔

گوہراللہ حیدرآباد چیمبر آف کامرس اینڈ انڈسٹری کے صدر بھی ہیں ،لاکھڑا کول مائنز کا ٹھیکا گوہراللہ کی کمپنی فتح گروپ نے حاصل کیا تھا ۔