سابق انڈس واٹر کمشنرجماعت علی شاہ کا کہنا ہے کہ پاکستان کا پانی بند کرنے کی بات کرکے بھارت نے گھٹیا پن کا ثبوت دیا ہے،پانی بند کر کے مودی 20 کروڑ پاکستانیوں کے معاشی قتل کی دھمکی دے رہا ہے۔
جماعت علی شاہ نے ’جیو نیوز‘ کو انٹرویو دیتے ہوئے مزید کہا کہ مودی کی کون سی بات مانیں، غربت کے خاتمے کی یا پانی بند کرنے کی، یہ کھلی معاشی دہشت گردی ہے۔
انہوں نے کہا کہ سندھ طاس معاہدہ ٹوٹ گیا تو جہلم اور چناب پر بھارتی ڈیم بننے کا خدشہ ہوسکتا ہے، جہلم اور چناب پر ڈیم بنے تو پانی بند نہیں ہوگا، پر کسانوں کو وقت پر پانی نہ ملنے کا خدشہ ہے
جماعت علی شاہ نے یہ بھی کہا کہ بھارت چاہے بھی تو دریائے سندھ اور جہلم کا پانی نہیں موڑ سکتا، لیکن چناب پر دریا موڑے جانے کا خطرہ ہے، بھارت کی جانب چناب کا پانی دو مقام سے راوی اور بیاس میں ڈالے جانے کا خطرہ پیدا ہوگیا ہے۔
ان کا کہنا تھا کہ ہمیں بین الاقوامی اداروں کو بتانا چاہئے کہ بھارت کو پاکستان سے ایسی زیادتی کرنے سے روکیں کیونکہ دونوں ایٹمی ممالک ہیں، ہمارا پانی روکا گیا تو ہماری مجبوری ہوگی کہ ہم طاقت سے اسے واپس حاصل کریں۔
فرمان الہی
نماز کے اوقات
