بارسلونا میں یوم تاسیس کشمیر کے عنوان سے پروگرام کا انعقاد

شفقت علی رضا...اسپین میں مقیم کشمیری اور پاکستانی کمیونٹی نے بارسلونا میں یوم تاسیس کشمیر کے عنوان سے ایک پروگرام کا انعقاد کیا جس کے مہمان خصوصی سفیر پاکستان میڈریڈ رفعت مہدی تھے ۔ پروگرام کا آغاز تلاوت کلام پاک سے ہوا جس کی سعادت الحاج قاری عبدالرحمان نے حاصل کی ۔

پروگرام سے مقامی سیاسی جماعت سوشلسٹ کی ایم این اے ’’ میرثے پریا‘‘، ہسپانوی حکومتی پارٹی پاپولر کے ’’ میگیل خورادو ‘‘ اور صوبہ کاتالونیا کے سیکرٹری امیگریشن ’’خوسے ماریا سالا‘‘ نے خطاب کرتے ہوئے اقوام متحدہ اور دوسری بڑی طاقتوں سے کہا کہ وہ مقبوضہ کشمیر میں جاری بھارتی آرمی کی جارحیت اور ظلم و تشدد کو بند کرانے میں اپنا کردار ادا کرے۔

اس موقع پر ہسپانوی مقررین کا کہنا تھا کہ 70سال ہوگئے لیکن ابھی تک کسی کو کشمیر میں ہونے والے انسانیت سوز ظلم نظر نہیں آئے ، یہ بڑے دُکھ اور الم کی بات ہے۔ سفیر پاکستان رفعت مہدی نے اپنے خطاب میں کہا کہ انٹرنیشنل کمیونٹی کو چاہئے کہ وہ آگے آئے اور نہتے کشمیریوں کو تحفظ دے ، انہیں اپنی مرضی سے جینے کا حق ملے اور ان کے حقوق کو پامال ہونے سے بچایا جائے۔

انہوں نے کہا کہ وزیر اعظم پاکستان نے رواں سال جنرل اسمبلی کے اجلاس میں دو ٹوک الفاظ میں مسئلہ کشمیر کو فوری حل کرنے کی ضرورت پر زور دیا ۔ دوران پروگرام وادی مقبوضہ کشمیر میں بھاتی آرمی کی طرف سے فائرنگ سے ہلاکتوں ، پیلٹ گن سے آنکھوں کے ضائع ہونے اور نوجوانوں کے جنازوں کی ویڈیو دکھائی گئی جسے دیکھ کر ہر آنکھ اشکبار ہوگئی۔

قونصل جنرل بارسلونا مراد اشرف جنجوعہ ، سعید شاہ ، راجہ گلفراز ایڈووکیٹ ، راجہ مختار سونی اور دوسرے مقررین نے بھی اپنے خیالات کا اظہار کرتے ہوئے کشمیریوں پر ہونے والے مظالم کی بھرپور مذمت کی ۔پروگرام میں اعلان کیا گیا کہ 27اکتوبر کو بھارتی سفارت خانہ میڈریڈ کے سامنے بہت بڑا احتجاج کیا جائے گا جس میں اسپین بھر سے کشمیری اور پاکستانی کمیونٹی شرکت کرے گی ۔