اسرائیل کا لبنانی علاقے سے فائرنگ کا الزام،لبنان کی تردید

اسرائیل نے الزام عاید کیا ہے کہ لبنان کی سرحد سے متصل علاقے میں لبنان کے اندر سے فائرنگ کی گئی ہے جسکا بھرپور جواب دیا گیا۔ تاہم دوسری طرف لبنانی فوج نے فائرنگ کی اطلاعات کی سختی سے تردید کی ہے۔

اسرائیلی ذرائع ابلاغ کےمطابق لبنانی فوج کی طرف سے جاری کردہ ایک بیان میں کہا گیا ہے کہ سرحد پر فائرنگ کے تبادلے کی خبریں صہیونی دشمن کے ذرائع ابلاغ کا مکروہ ڈرامہ ہے جس میں کوئی صداقت نہیں ہے۔

جب کہ دوسری طرف اسرائیلی فوج کا کہنا ہے کہ لبنان سے کی گئی فائرنگ کے نتیجے میں اس کا ایک اہلکار زخمی بھی ہوا ہے۔اسرائیلی فوج کے دعوے میں کہا گیا ہے کہ لبنان کے اندر سےسرحد پر گشت میں مصروف ایک فوجی پارٹی پر فائرنگ کی گئی۔

فائرنگ کے نتیجےمیں ایک فوجی اہلکار زخمی ہوا۔ اسرائیلی فوج کا کہنا ہے کہ لبنان کے اندر جس سمت سے فائر کیا گیا تھا اس طرف جوابی فائرنگ بھی کی گئی ہے۔