وکلاء کا کسی جمہوریت مخالف تحریک میں شامل نہ ہونے کا اعلان

وکلاء رہنماؤں نے جمہوریت کے خلاف کسی تحریک میں شامل نہ ہونے کا اعلان کیا ہے۔پاکستان بار کونسل کے رکن اعظم نذیر تارڑ کاکہنا ہے کہ وکلاء جمہوریت کو ڈی ریل کرنے کی کسی کوشش کا حصہ نہیں بنیں گے ۔

لاہور ہائی کورٹ بار میں وکلاءکے سیمینار سے خطاب کرتے ہوئے انہوں نے کہا کہ وکلاء قانون کی بالادستی پر یقین رکھتے ہیں، اسلام آباد یاکسی بھی شہر کو بند کرنا قانوناً جرم ہے، وکلاء جمہوریت ڈی ریل کرنے کی کسی کوشش کا حصہ نہیں بنیں گے۔

پیپلز پارٹی کے رہنما اور سابق وفاقی وزیر قانون فاروق ایچ نائیک کا کہنا تھا کہ اسلام آباد کو بند کرنے کا اعلان غیر قانونی ہے، وکلاء انتشار کی کسی تحریک کی حمایت نہیں کریں گے، جمہوریت احتجاج کی اجازت دیتی ہے، کردار کشی کی نہیں۔