کسی اداکار کا باکس آفس پر سلمان خان سے مقابلہ نہیں، شاہ رخ

بولی وڈ اسٹار شاہ رخ خان نے اعتراف کیا ہے کہ باکس آفس پر سلمان خان سے مقابلہ نہیں کرسکتا بلکہ انڈسٹری کا کوئی بھی اداکار سلمان سے مقابلہ کرنے کی ہمت نہیں رکھتا۔

بولی وڈ اسٹار شاہ رخ خان کواداکاری کے ساتھ ساتھ باکس آفس کا بھی کنگ کہا جاتا ہے اور یہی وجہ ہے کہ سلمان خان بھی متعدد بار کنگ خان سے باکس آفس پر مقابلے میں اپنی شکست تسلیم کرچکے ہیں لیکن اب پہلی بار شاہ رخ خان نے باکس آفس پر مقابلے میں شکست کو تسلیم کرلیا ہے۔

شاہ رخ خان کا اپنے انٹرویو میں کہنا تھا کہ دپیکا پڈوکون، کترینہ کیف اور پریانکا چوپڑا آج کچھ اداکاروں سے زیادہ معاوضہ وصول کرتی ہیں جس کی وہ اہل ہیں۔ شاہ رخ خان کا سلمان سے باکس آفس پر مقابلے کے سوال پرکہنا تھا کہ باکس آفس پر سلمان خان سے مقابلہ نہیں کرسکتا بلکہ انڈسٹری کا کوئی بھی اداکار سلمان سے مقابلہ کرنے کی ہمت نہیں رکھتا ہے۔

واضح رہے کہ شاہ رخ خان نے سلمان خان کی فلم ’’سلطان‘‘ سے باکس آفس پر مقابلے کے باعث اپنی فلم’’رئیس‘‘ کی تاریخ 6 جولائی سے بڑھا کر 25جنوری رکھی تھی۔