پاکستان کرکٹ بورڈ نے کھیل میں کرپشن کے نئے الزامات کے بعد وسیع پیمانے پر تحقیقات کرنے کا فیصلہ کیا ہے، بورڈ 15 دن میں بڑے کمیشن کے قیام کا اعلان کرے گا ۔ وسیع پیمانے پر تحقیقات پاکستان سپر لیگ کے بعد شروع کی جائیں گی ۔
پاکستان کرکٹ بورڈ کے اعلیٰ عہدیدار کے مطابق شرجیل خان اور خالد لطیف کی معطلی پر ہی معاملہ ختم نہیں ہو گابلکہ وسیع پیمانے پر تحقیقات ہوں گی اورایک بڑا کمیشن تشکیل دیا جائے گا، جس کی سفارشات پر مجرموں کو کڑی سزائیں ملیں گی۔
عہدیدار کا کہنا ہے کہ تمام کارروائی ضابطے کے مطابق کی جائے گی۔ اگر معطل کھلاڑی اپیل کرتے ہیں تو ایک رکنی اینٹی کرپشن کمیٹی ان کی اپیل کی سماعت کرے گی اور پھر کمیشن اپنے کام کا باقاعدہ آغاز کرے گا ، کمیشن میں مشکوک کھلاڑیوں کے علاوہ مینجمنٹ کے اراکین کو بھی بلایا جائے گا ۔