تجربے کار امپائر خالد محمود پاکستان سپر لیگ میں نظر انداز

سید یحیی حسینی
ایک طرف جہاں پاکستان سپر لیگ سیزن ٹوکی دھوم ہے وہیں لیگ کے میچوں میں ناقص امپائرنگ کے معیار پر انگلیاں اٹھ رہی ہیں۔

ایسے میں یہ امر انتہائی حیران کن ہے کہ خالد محمودسینئر جنھوں نے 9دسمبر 2016ء کو شیر بنگلہ نیشنل اسٹیڈیم ،میرپور میں مقامی امپائر محفوظ الرحمٰن کے ساتھ بنگلہ دیش پریمئر لیگ کا فائنل سپر وائز کیاتھا،انھیں پاکستان کرکٹ بورڈ نے پی ایس ایل امپائرنگ پینل میں شامل ہی نہیں کیا۔

اڑتالیس سال کے خالد محمود کا شمار پاکستان میں تجربے کار امپائرز کی فہرست میں کیا جاتا ہے۔20سال کا امپائرنگ میں تجربہ رکھنے والے خالد محمود کو گزشتہ سال پاکستان سپر لیگ میں ٹی وی یا پھر چوتھے امپائر کی ذمہ داریوں تک محدود رکھا گیا تھا۔