شہباز شریف نے بینظیر اور نواز کیساتھ یادگار تصویر جاری کردی

پنجاب کے وزیر اعلیٰ شہباز شریف نے ملک بدری کے دوران بڑے بھائی نواز شریف کے ساتھ لی گئی تصویر سوشل میڈیا پر جاری کردی ہے، اس تصویر میں سابق وزیر اعظم شہید بے نظیر بھٹو کوبھی دیکھا جاسکتا ہے۔

وزیر اعلیٰ شہبازشریف کے مطابق وہ اپنے موبائل فون پر براؤزنگ کررہےتھے کہ ماضی کے جھروکوں سے یہ یاد گار تصویر نمایاں ہوگئی۔

یہ2006ء یا 2007ء کے دوران شریف برادران کی ملک بدری کا دورتھا، جب تینوں قائدین لندن میں تھے اور پاکستان میں جنرل پرویز مشرف اقتدار پر براجمان تھے۔

تصویر میں بے نظیر بھٹو کو دائیں، میاں نوازشریف کو درمیان میں جبکہ شہبازشریف کو بائیں جانب دیکھا جاسکتا ہے،تینوں قائدین نہایت سنجید گی سے تبادلہ خیال کرتے دکھائی دے رہےہیں۔