ملک کو بچانے کیلئے ایک نظرئیے کی ضرورت ہے، مصطفیٰ کمال

پاک سر زمین پارٹی کے سربراہ مصطفیٰ کمال نے کہا ہے کہ دو قومی نظریئے کی بنیاد پر بننے والے پاکستان کو بچانے کیلئے آج ایک نظریئے کی ضرورت ہے، انہوں نے حکومت کو یہ الٹی میٹم بھی دیا کہ کراچی کے حالات درست نہ ہوئے تو 6 اپریل سے احتجاجی تحریک شروع کردیں گے۔

مصطفیٰ کمال نے پاک سرزمین پارٹی کے پہلے یوم تاسیس پر ورکرز کنوینشن سے خطاب میں کہا کہ ماضی میں جس ملک کو دو قومی نظریئے کی بنیاد پر بنایا تھا، آج اُسے بچانے کیلئے ایک نظریہ اپنانے کی ضرورت ہے، اگر عوامی مسائل حل نہیں ہوتے تو پھر بڑے بڑے کوریڈور بنانے کا کوئی فائدہ نہیں۔

مصطفیٰ کمال کا کہنا تھا کہ دو ہزار اٹھارہ کے الیکشن کا انتظار نہیں کرسکتے ،ہم پاکستان مخالف نعرے لگانے والے نہیں ،یہ ملک ہمارا ہے اور معاملات ٹھیک نہ ہوئے تو اب حکمران مردہ باد کا نعرہ لگے گا ۔

مصطفیٰ کمال نے دعویٰ کیا کہ دوہزار اٹھارہ میں سندھ اور دو ہزار تیئس میں پورے ملک میں کامیابی حاصل کرنے کے بعد وزیراعظم پاک سر زمین پارٹی کا ہوگا۔