برطانیہ: تھریسا مے کاقبل از وقت انتخابات کا اعلان

برطانوی وزیر اعظم تھریسا مے نے قبل از وقت انتخابات کا اعلان کر دیا۔ برطانوی میڈیا کے مطابق تھریسا مے 8 جون کو قبل از وقت انتخابات چاہتی ہیں۔

ارکان پارلیمان 8 جون کو عام انتخابات کرانے پر کل بدھ کے روز ووٹنگ کریں گے۔ وزیر اعظم کو فیکسڈ ٹرم پارلیمنٹ ایکٹ معطل کرنے کے لیے ارکان پارلیمان کی دو تہائی اکثریت کی منظوری درکار ہے۔

برطانوی قانون کے مطابق اگلے عام انتخابات مئی 2020 میں ہونا ہیں۔ تھریسا مے کا کہنا ہے کہ وہ بریگزٹ کے مخالفین کو برطانیہ کمزور بنانے نہیں دیں گی۔

دوسری جانب اسکاٹش نیشنل پارٹی کی سربراہ نکولا اسٹرجن کا کہنا ہے کہ کنزرویٹیو پارٹی عام انتخابات کو برطانیہ کو دائیں جانب موڑنے کا موقع سمجھتی ہے اور ہارڈ بریگزٹ کے لیے استعمال کرنا چاہتی ہے۔ جبکہ سابق وزیر اعظم ڈیوڈ کیمرون نے ٹریسا مے کے فیصلے کو درست اور بہادرانہ قرار دیا ہے۔