پاکستان کپ میں پنجاب کی ٹیم کے کپتان عمر اکمل میچ میں اپنی ہی ٹیم کے کھلاڑی فاسٹ بولر جنید خان کی میچ میں عدم دستیابی کے بارے میں بے خبر نکلے جبکہ جنید کا کہنا ہے کہ وہ بیمار ہیں جس کا علم ٹیم مینجمنٹ اور ڈاکٹر کو بھی تھا۔
راولپنڈی میں جاری پاکستان کپ میں سندھ کے خلا ف میچ میں پنجاب کی ٹیم کے کپتان عمر اکمل نے ٹاس کے موقع پر کہا کہ انہیں جنید خان کی دستیابی کے بارے میں علم نہیں۔
کپتان کا کہنا تھا کہ جنید خان کے بارے میں نہ تو اُنہیں معلوم ہے اور نہ ہی ٹیم مینجمنٹ کو،دوسری جانب اپنے کپتان کی جانب سے یہ ریمارکس سن کر جنید خان حیرت میں پڑگئے۔
انہوں نے عمر اکمل کو جواب دیتے ہوئے کہا کہ وہ بیمار ہیں جس کا علم ٹیم ڈاکٹر اور مینجمنٹ کو ہے، عمر اکمل کو بھی ان کی بیماری کا پتہ ہے لیکن انہیں حیرت ہے کہ کپتان نے ایسا کیوں کہا۔
پاکستان کرکٹ بورڈ نے دونوں کھلاڑیوں کی اس بیان بازی کا فوری طور پر نوٹس لے لیا ہے اور حقیقت جاننے کے لیے تین رکنی کمیٹی بھی تشکیل دے دی ہے جس کے سربراہ جنرل منیجر ڈومیسٹک کرکٹ شفیق احمد پاپا ہوں گے، دیگر اراکین میں پنجاب کی ٹیم کے منیجر اور کوچ شامل ہیں۔