کرن جوہرکو بلیک میل کرنے والا گروہ گرفتار

بالی وڈ کے معروف فلمساز کرن جوہر کو بلیک میل کرنے والے 6 رکنی گینگ کو گرفتار کرلیا گیا ہے۔

بھارتی میڈیا رپورٹس کے مطابق سائبر کرائم پولیس نے بھارتی شہر حیدر آباد دکن میں چھاپے مار کرکرن جوہر کو بلیک میل کرنے والے 6 میں سے ایک شخص کو گرفتار کیا جس سے تفتیش کے بعد گینگ میں شامل 3 افراد کو دہلی اور2 کو بھارتی ریاست بہار سے حراست میں لیا گیا ۔

ان میں ایک سینما مالک بھی شامل ہے۔ گرفتار گروہ سے کئی فلموں کے پرنٹ بھی برآمد کرلیے گئے ہیں۔

کرن جوہر نے ممبئی کے سائبر کرائم سیل میں بعض افراد کی جانب سے بلیک میل کرنے کی درخواست جمع کرائی تھی ۔

درخواست میں مؤقف اختیار کیا گیا کہ بعض افراد کی جانب سے فلم ’’باہو بلی 2‘‘ کے ایچ ڈی پرنٹ کی کاپی آن لائن لیک نہ کرنے کے بدلے 15 لاکھ روپے دینے کا مطالبہ کیا گیا اور عدم ادائیگی پر فلم کو آن لائن لیک کرنے کی دھمکیاں دی جارہی ہیں ۔

درخواست کے مطابق بلیک میل کرنے والے افراد کے عمل سے فلم کے کاروبار کو نقصان پہنچ سکتا ہے لہٰذا فی الفور کارروائی کی جائے۔